کیا عورت کی پوری زندگی کی وفا کا صلہ سوتن ہے؟ بسمل ڈرامے نے مردوں کی دوسری شادی کرنے پر نئے سوال کھڑے کردیے

" میں نے دوسری شادی کی ہے گناہ کا راستہ اختیار نہیں کیا. مرد دوسری شادی سکون کے لیے کرتا ہے. معصومہ نے مجھے احساس دلایا کہ میں کسی کے لیے اتنا خاص بھی ہوسکتا ہوں۔میں ایسا نہیں کہہ رہا کہ تم سے محبت نہیں کرتا لیکن تم نے مجھے فتح کی ہوئی ملکیت کی طرح چاہا اور اس نے مجھے بتایا کہ اسے مجھ سے محبت ہے"

یہ ڈائیلاگ آج کل آن ائیر چلنے والے مشہور ڈرامہ سیریل "بسمل" کے ہیں جس میں شوہر (نعمان اعجاز) اپنی پہلی بیوی ( سویرا ندیم ) سے دوسری شادی کی وجہ بیان کرتا ہے.

بسمل ڈرامہ ایسی کہانی ہے جس میں شوہر جوان بیٹے کی منگنی کے بعد خود دفتر کی ملازمہ سے دوسری شادی کر بیٹھتا ہے. اس شادی کی وجہ معصومہ (حریم فاروقی) کی لالچ اور ٹی ٹی (نعمان اعجاز ) کی بے پناہ دولت ہے.

البتہ نعمان اعجاز کے اس ڈائیلاگ سے سوشل میڈیا صارفین میں نئی بحث چھڑ گئی ہے. بہت سے صارفین کا خیال ہے کہ مرد کو ایک سے زائد شادی کی اجازت مذہب نے دی ہے اس لئے بیوی کو اس وجہ سے شوہر سے قطع تعلقی نہیں کرنی چاہیے جبکہ کچھ صارفین کا یہ بھی کہنا ہے کہ جب ایک لڑکی نے اپنی زندگی ایک شخص کے نام کردی اور بڑھاپے میں مرد اس کو چھوڑ کر جوان عورت سے شادی کر لے تو پہلی بیوی کے پاس کیا باقی رہ جاتا ہے.