20 سال گھر میں رہا، ماں باپ کے بعد سب نے دھتکار دیا۔۔ آؤچ آؤچ کر کے سب کو ہنسانے والے 'اسپیرو' کی اپنی زندگی کتنی مشکل تھی؟ بتاتے ہوئے جذباتی

Social Media Star Sparrow Butt Talks About His Personal Life

اسپیرو بٹ پاکستان کے معروف ڈیجیٹل کریئیٹر ہیں، جنہوں نے ابتدا میں اپنے جرات مندانہ اور نسوانی انداز کے کانٹینٹ سے سوشل میڈیا پر پہچان بنائی۔ انہوں نے اپنے سوشل میڈیا کیریئر کا آغاز دبئی سے کیا۔ آج کل وہ اپنے منفرد منی فوڈ ولاگز کی وجہ سے خبروں میں ہیں، جہاں ان کا کھانا چکھنے کا انداز اتنا وائرل ہوا کہ کئی لوگ ان کی نقل کرنے لگے۔ اس وقت وہ امریکہ میں مقیم ہیں۔

حال ہی میں اسپیرو بٹ کے ایک انٹرویو کی ویڈیو کلپ سوشل میڈیا پر گردش کر رہی ہے، جس میں انہوں نے اپنی زندگی کے تلخ تجربات، مسلسل بُلنگ (ڈرانا دھمکانا) اور جسمانی تشدد کے بارے میں کھل کر بات کی۔

اپنی ذاتی زندگی بیان کرتے ہوئے اسپیرو بٹ نے کہا، "میں والدین کا اکلوتا ہوں، بہت کم عمر تھا جب میری زندگی میں کچھ ایسی کمزوریاں تھیں جن پر میرا بس نہیں چلتا تھا۔ میرا رجحان نسوانیت کی طرف تھا اور میرے والدین اس حقیقت سے آگاہ تھے۔ والدین اپنے بچوں کی کمزوریوں کو سمجھتے ہیں۔ میرے اندر کچھ ایسی صفات تھیں جنہیں میں بدل نہیں سکتا تھا۔ اسی وجہ سے مجھے باہر کھیلنے کی اجازت نہیں تھی اور میری زندگی کے پہلے بیس سال زیادہ تر گھر کی چار دیواری میں گزرے۔ میں صرف اسکول اور یونیورسٹی جاتا تھا؛ میں نے بینکنگ اینڈ فنانس میں ایم بی اے کیا ہے۔ میرے والد مجھے وقت سے دس منٹ پہلے چھوڑتے اور دس منٹ پہلے واپس لے جاتے تھے۔"

انہوں نے مزید بتایا، "بیس سال میرا کوئی دوست نہیں بنا۔ لوگ میری نسوانی خصوصیات کی وجہ سے مجھ سے دوستی نہیں کرنا چاہتے تھے۔ میرے اندر نرمی اور نزاکت تھی جو عموماً خواتین میں سمجھی جاتی ہے، اسی لیے لڑکیاں میری دوست بن جاتیں، مگر وہ مجھے دوسروں سے متعارف کرواتے ہوئے شرم محسوس کرتیں۔ یہ بات مجھے اندر سے توڑ دیتی تھی کیونکہ میں جذباتی طور پر جُڑ جاتا تھا۔"

والدین کی بات پر انہوں نے بتایا کہ، "میرے والد کی وفات کو 8 اور والدہ کو 7 سال ہوچکے ہیں۔ ان کے جانے کے بعد ننیال ددیال سب نے مجھ سے تعلق ختم کر لیا۔ میں مکمل طور پر تنہا رہ گیا۔ اسی تنہائی میں اللہ نے مجھے اپنے قریب کر لیا اور میری زندگی سے خودبخود منفی لوگوں کو دور کر دیا۔ میں تنہائی پسند شخص ہوں، سوشل میڈیا پر جو ہے وہ صرف ایک کردار ہے اور کچھ نہیں۔"

اسپیرو بٹ کی کہانی صرف ایک ڈیجیٹل کریئیٹر کی نہیں، بلکہ اس حوصلے کی مثال ہے جو تنقید، تنہائی اور تکلیف کے باوجود انسان کو آگے بڑھنے کا حوصلہ دیتی ہے۔