ہمیں اب راحت فتح علی خان کو پہلے سے زیادہ عزت دینی چاہیے ۔۔ ریشم نے راحت فتح کی حمایت میں آواز اٹھا دی

پاکستان شوبز انڈسٹری کی معروف اداکارہ ریشم نے گلوکار راحت فتح علی خان کی حمایت کردی۔ان کا کہنا ہے کہ لوگوں کو اب گلوکار راحت فتح علی خان کو پہلے سے زیادہ عزت اور محبت دینی چاہیے۔

ریشم نے حال ہی میں نجی ٹی وی کے پروگرام میں بطور مہمان شرکت کی جہاں اُنہوں نے راحت فتح علی خان کی ملازم پر تشدد کرتے وائرل ویڈیو کے واقعے سے متعلق بات کی۔

اُنہوں نے کہا کہ راحت فتح علی خان ہمارے ملک کا بہت بڑا نام ہیں وہ جہاں بھی گئے اُنہوں نے ہمیشہ پاکستان کا نام روشن کیا ہے۔

اداکارہ نے کہا کہ میرے دل میں راحت فتح علی خان صاحب کی ایک بات بہت اچھی لگی کہ جس انسان کا اُنہوں نے دل دکھایا اس سے بھی معافی مانگی، اللّٰہ سے معافی مانگی، پھر ہم سب لوگوں سے بھی معافی مانگی جس کے بعد میری نگاہ میں ان کی عزت پہلے سے زیادہ بڑھ گئی۔

اُنہوں نے مزید کہا کہ دنیا میں ایسے بہت کم لوگ ہوتے ہیں جو اپنی غلطی کو مانتے ہیں، اس لیے ہمیں چاہیے کہ ہم راحت فتح علی خان صاحب کو پہلے سے زیادہ عزت اور محبت دیں۔

یاد رہے کہ رواں سال 27 جنوری کو سوشل میڈیا پر راحت فتح علی خان کی ایک ویڈیو وائرل ہوئی تھی جس میں وہ اپنے گھریلو ملازم پر تشدد کررہے تھے، مذکورہ ویڈیو میں گلوکار اپنے ملازم سے کسی بوتل کا پوچھ رہے تھے۔ جس پر راحت فتح علی خان نے ویڈیو پیغام میں بتایا تھا کہ وہ اس بوتل میں ان کے پیر کا دم کیا ہوا پانی موجود تھا جو ان کے ملازم سے کھو گیا تھا۔