4 شادیاں کیں لیکن 3 بچے ایک ہی شوہر سے ہیں.. نور بخاری کے نجی زندگی سے متعلق اہم انکشافات

"ہم ایسے معاشرے میں رہتے ہیں جہاں گرل فرینڈ اور بوائے فرینڈ کلچر عام ہے لیکن ایک سے زائد شادیاں قبول نہیں"

یہ کہنا ہے اسلام کی خاطر شوبز انڈسٹری سے کنارہ کشی کرنے والی سابقہ اداکاری نور بخاری کا جنھوں نے حال ہی میں حافظ احمد کے پوڈکاسٹ میں شرکت کی اور اپنی نجی زندگی کے بہت سے رازوں سے پردہ اٹھایا.

نور بخاری کا کہنا تھا کہ مجھے اپنی پہلی شادی کی تاریخ یاد نہیں اور نہ ہی میں یاد کرنا چاہتی ہوں کیونکہ وہ میرا ماضی تھا اور میں اپنے حال میں بہت خوش ہوں۔ میں نے ایک سے زائد شادیاں کی ہیں. میری تمام شادیاں محبت کی تھیں لیکن بدقسمتی سے میری شادیاں ناکام ہوئیں اور اب میں موجودہ شادی سے خوش اور مطمئن ہوں۔

اپنی گفتگو جاری رکھتے ہوئے نور بخاری نے مزید کہا کہ لوگوں نے افواہیں اُڑائیں کہ میں نے پانچ شادیاں کی ہیں، اگر وہ یہ بھی کہہ دیں کہ نور نے دس شادیاں کی ہیں تو مجھے ان کی بات سے کوئی فرق نہیں پڑے گا۔

"میں نے تین مردوں سے چار بار شادیاں کی ہیں یعنی میں نے اپنے موجودہ شوہر عون چوہدری سے دو بار شادی کی ہے جبکہ میرے تینوں بچوں کے والد عون چوہدری ہی ہیں. باقی سابق شوہروں سے میری کوئی اولاد نہیں"

"میری بڑی بیٹی فاطمہ کی عمر 11 سال، دوسری بیٹی شہربانو کی عمر 4 سال جبکہ بیٹے محمد علی رضا کی عُمر ایک سال ہے۔ پہلی بیٹی جب پیدا ہونے والی تھی تب ہی اس کے لئے رول ماڈل بننے کا خیال دل میں آیا اور حجاب کرنا شروع کردیا"