اتنی بری ایکٹنگ، اداکاری بھول گئی ہے۔۔ سعدیہ امام کی اشنا شاہ پر شدید تنقید! صارفین بھی میدان میں آگئے

سعدیہ امام اکثر مختلف ڈراموں کے کانٹینٹ، اداکاری اور ہدایت کاری وغیرہ پر تبصرہ کرتی دکھائی دیتی ہیں۔

حال ہی میں انہوں نے ’اے عشق جنوں‘ ڈرامے میں اشنا شاہ کی اداکاری پر تبصرہ کرتے ہوئے انہیں تنقید کا نشانہ بنایا۔

اس ڈرامے میں اشنا شاہ (ایمن) جبکہ شہریار منور (راحم) کا کردار ادا کر رہے ہیں۔ ان دونوں کا یہ ایک ساتھ پہلا ڈرامہ ہے۔

سعدیہ امام کا اُن پر تنقید کرتے ہوئے کہنا تھا کہ، مجھے ڈرامے میں ان کی اداکاری سمجھ نہیں آرہی، وہ اچھی خاصی اداکارہ تھیں، اب معلوم نہیں انہیں کیا ہوگیا۔ ایسا لگتا ہے جیسے اداکاری ہی بھول گئی ہیں۔"

ساتھ ہی انہوں نے اداکارہ کے ماضی کے ایک ڈرامے کا حوالہ بھی دیا کہ، اشنا نے جویریہ عباسی کے ساتھ 'حبس' میں کام کیا تھا، جس میں مجھے اس کی اداکاری بےحد پسند آئی تھی، تو وہی اداکاری ’ایمن‘ کے کردار میں کیوں نہیں نظر آرہی؟ اب وہ اداکارہ کہاں گئی؟

ڈرامے کے حوالے سے سعدیہ کا کہنا تھا کہ، مجموعی طور پر ڈراما اچھا ہے، کچھ سینز بھی معقول ہیں، تاہم وہ اداکاری سے مطمئن نظر نہیں آئیں۔

دوسری جانب صارفین بھی سعدیہ امام کی باتوں سے متفق نظر آئے۔ ایک صارف نے لکھا کہ، اشنا اب اداکاری بھول چکی ہیں، تو دوسرے کا کہنا تھا کہ، اتنے اہم موضوع پر بننے والے ڈرامے میں کسی منجھی ہوئی اداکارہ کو کاسٹ کیا جانا چاہیے تھا۔ جبکہ کچھ لوگوں کا ماننا ہے کہ، اشنا شاہ کے ساتھ کوئی مسئلہ ہوا ہے، اسی لیے وہ بہتر پرفارم نہیں کر پا رہی ہیں۔