انڈین فلم کی نقل سے باز نہیں آئے.. دانش تیمور کے نئے ڈرامے 'شیر' کا پرومو دیکھ کر صارفین کی تنقید

Netizen Comments On Danish Taimoor And Sara Khan Drama Sher Teaser

آخرکار وہ لمحہ آ ہی گیا جس کا مداحوں کو بے صبری سے انتظار تھا! زنجبیل آصف شاہ کے قلم اور احسن تالش کی ہدایت کاری میں بننے والا ڈرامہ 'شیر' اپنا پہلا ٹیزر لے کر آ گیا ہے، اور وہ بھی ایسا کہ دل تھام کے دیکھنا پڑے۔

دانش تیمور، ہمیشہ کی طرح غصے سے بھرپور اور انتقام کی آنکھوں میں چمک لیے، ہتھیار اٹھائے اسکرین پر داخل ہوتے ہیں۔ دوسری جانب سارہ خان، روایت اور بغاوت کا حسین امتزاج، گھگھرا چولی میں ملبوس اور ہاتھ میں بندوق لیے، بے خوف انداز میں سامنے کھڑی ہیں۔ لمحہ وہ ہے جب دونوں ایک دوسرے پر بندوق تان لیتے ہیں — دو دشمن قبیلے، دو آتشیں کردار، اور ایک آمنے سامنے کا ٹکراو۔

اس سنیماٹوگرافی، انداز، اور جذباتی شدت نے فلم بینوں کو فوراً ایک اور مشہور جوڑی کی یاد دلا دی دیپیکا پڈوکون اور رنویر سنگھ کی پہلی فلم رام لیلا، جہاں محبت اور دشمنی کی لکیریں ایک ہی مقام پر آ کر ملتی ہیں۔

اگرچہ ’’شیر‘‘ کی کہانی مکمل طور پر منفرد لگتی ہے، لیکن یہ ٹیزر ضرور اشارہ دے گیا کہ ہمیں ایک جذباتی، دل کو چھو لینے والی اور ایکشن سے بھرپور کہانی دیکھنے کو ملے گی۔ کیا یہ جنگ صرف طاقت کی ہے یا دلوں کی بھی؟ اس کا جواب تو ڈرامے کی قسطیں ہی دیں گی، لیکن ایک بات طے ہے، یہ تصادم ناظرین کو اسکرین سے ہٹنے نہیں دے گا۔