شوبز میں دوستی کم، دلوں میں کینہ زیادہ ہے۔۔ نعمان اعجاز نے کس کے بارے میں ایسا کہا؟ ویڈیو

Nauman Ijaz Reveals The Reality Of Showbiz Industry

پاکستانی ڈرامہ انڈسٹری کے سینئر اور منجھے ہوئے اداکار نعمان اعجاز نے شوبز کے اندر چھپے تلخ رویّوں پر پردہ اٹھاتے ہوئے ایک چونکا دینے والا انکشاف کیا ہے۔ ان کے مطابق اس انڈسٹری میں بظاہر مسکراہٹیں ہیں، مگر دلوں میں شکایتیں اور رنجشیں بھری ہوئی ہیں۔

ایک حالیہ گفتگو کے دوران انہوں نے ہدایتکارہ و اداکارہ سنگیتا کے بیان پر بالواسطہ ردعمل دیتے ہوئے کہا کہ برسوں کے تجربے نے انہیں یہ سبق سکھایا ہے کہ یہاں اکثر لوگ دل میں بات رکھ لیتے ہیں۔ ان کا کہنا تھا کہ اگر کوئی فنکار کسی وجہ سے کسی پروجیکٹ کو منع کر دے تو اسے انا کا مسئلہ بنا لیا جاتا ہے، اور پھر آئندہ ساتھ کام نہ کرنے کا فیصلہ کر لیا جاتا ہے۔

نعمان اعجاز نے نہایت صاف گوئی سے کہا کہ خدا کا شکر ہے کہ اس شعبے میں میرے مخالفین کم نہیں۔ ان کے مطابق کہا جاتا ہے کہ جتنے زیادہ مخالف ہوں، اتنی ہی کامیابی نصیب ہوتی ہے۔ مگر ایک باپ ہونے کے ناطے وہ نہیں چاہتے کہ ان کا بیٹا زاویار بھی اسی تلخ ماحول کا سامنا کرے۔ تاہم، وہ یہ بھی مانتے ہیں کہ اگر یہ سب اس کی تقدیر میں لکھا ہے تو اسے بدلا نہیں جا سکتا۔

انہوں نے بتایا کہ انہوں نے زاویار سے دعا کی درخواست کی ہے کہ جو رنجشیں لوگ ان سے رکھتے ہیں، وہ بیٹے پر نہ نکالیں۔ افسوس کے ساتھ انہوں نے یہ بھی کہا کہ کچھ لوگ مختلف انداز میں اپنا غصہ نکال رہے ہیں۔ ان کے بقول، ٹھوکریں انسان کو مضبوط بناتی ہیں، بڑے انسان بننے کے لیے گرنا پڑتا ہے

بات کو آگے بڑھاتے ہوئے نعمان اعجاز نے نئی نسل کے فنکاروں پر بھی روشنی ڈالی۔ ان کا کہنا تھا کہ آج کے اداکار شہرت کے سیلاب میں سمت کھو بیٹھے ہیں۔ سوشل میڈیا نے فوری پہچان اور آسان کمائی کا راستہ تو دیا ہے، مگر اس کے ساتھ توجہ بھی منتشر کر دی ہے۔

انہوں نے افسوس کا اظہار کیا کہ ماضی میں فنکاروں کے گرد جو تجسس اور کشش ہوا کرتی تھی، وہ اب ختم ہوتی جا رہی ہے۔ وجہ یہ ہے کہ آج فنکار ہر پلیٹ فارم پر موجود ہیں، ہر لمحہ اپنی ذاتی زندگی کی نمائش کر رہے ہیں، محض پیسوں کی خاطر۔ جب چہرے ہر جگہ دکھائی دیں تو شائقین کی دلچسپی بھی ماند پڑ جاتی ہے۔

آخر میں انہوں نے یہ نکتہ اٹھایا کہ آج کا فنکار اپنی صلاحیت نکھارنے کے بجائے ظاہری شخصیت سنوارنے میں زیادہ مصروف ہے۔ ان کے نزدیک اصل کامیابی ہنر میں ہے، نہ کہ فلٹرز اور فالوورز میں۔

یہ گفتگو نہ صرف شوبز کے تلخ حقائق کو عیاں کرتی ہے بلکہ نئی نسل کے لیے ایک سنجیدہ پیغام بھی چھوڑ جاتی ہے۔