بیٹے کی خواہش تو سب کے دل میں ہوتی ہے اور۔۔ ایک کے بعد ایک 3 بیٹیوں کی پیدائش ! منیب بٹ نے پہلی بار دل کے راز کھول دیے

Muneeb Butts Honest Opinion About Wanting A Son

"بیٹے کی خواہش ہر مرد کے دل میں کہیں نہ کہیں ضرور ہوتی ہے، لیکن مجھے اس بات کا کوئی غم نہیں کہ میرا بیٹا نہیں ہے۔ میری بیٹیاں ہی میری دنیا، میری خوشی اور میری کامیابی ہیں۔ جس سال میرے گھر بیٹی پیدا ہوئی، اُسی سال اللہ نے میرے رزق اور کام میں بے پناہ برکت دی۔ میں سمجھتا ہوں کہ بیٹیاں رحمت ہیں، اور میں واقعی خوش نصیب ہوں کہ میرے گھر تین رحمتیں ہیں۔"

پاکستانی ڈرامہ انڈسٹری کے مقبول اداکار منیب بٹ ہمیشہ اپنی فیملی سے بے پناہ محبت کے اظہار کے لیے جانے جاتے ہیں، مگر اس بار انہوں نے جو بات کہی، اس نے ہر سننے والے کا دل پگھلا دیا۔ زارا نور عباس کے یوٹیوب شو میں گفتگو کرتے ہوئے انہوں نے نہ صرف بیٹے کی خواہش پر کھل کر بات کی بلکہ بیٹیوں کو اپنی اصل طاقت قرار دیا۔

منیب نے مسکراتے ہوئے کہا کہ زمانہ بدل گیا ہے۔ “اب عورت کسی سے کم نہیں، وہ مردوں کے شانہ بشانہ ہر میدان میں موجود ہے۔” انہوں نے اپنی اہلیہ ایمن خان اور ان کی بہن منال خان کی مثال دیتے ہوئے کہا کہ “دونوں نے بہت کم عمر میں اپنے گھر اور کام کو جس انداز میں سنبھالا، وہ واقعی قابلِ تعریف ہے۔”

اداکار کا کہنا تھا کہ وہ اپنی بیٹیوں کے ساتھ سختی نہیں کرتے بلکہ ان پر بے حد پیار نچھاور کرتے ہیں۔ البتہ اگر بیٹا ہوتا تو شاید اس کی تربیت میں زیادہ سختی کرتے تاکہ وہ زندگی کے جھٹکوں کا مقابلہ مضبوطی سے کر سکے۔ مگر ان کے مطابق، “میری بیٹیوں میں ہی میرا حوصلہ، سکون اور کامیابی چھپی ہے۔”

منیب بٹ نے اپنے عائلی اصولوں پر بھی روشنی ڈالتے ہوئے بتایا کہ وہ کبھی گھر کے افراد پر اپنی تھکن یا مسائل ظاہر نہیں کرتے۔ “میں چاہتا ہوں کہ جب میں گھر آؤں تو میری بیٹیاں صرف ہنستا ہوا باپ دیکھیں، نہ کہ ایک تھکا ہوا آدمی۔”

2018 میں ایمن خان سے شادی کے بعد، منیب کی زندگی مکمل طور پر بدل گئی۔ ان کے گھر تین بیٹیاں امل، میرال اور نیمل اللہ کی عطا ہیں۔ دلچسپ بات یہ ہے کہ جس سال ان کی کسی بیٹی نے جنم لیا، اسی سال ان کے ڈرامے سپرہٹ ہوئے، نئے پروجیکٹس ملے اور مالی حالات میں غیر معمولی بہتری آئی۔