صرف اپنے نہیں سب کے بچوں کی جان بچاؤں گا.. اپنی جان خطرے میں ڈال کر 25 لوگوں کی جان بچانے والا یہ شخص کون ہے؟

"فجر کے وقت بیٹے کی فون کال سنی اور آگ کا سُن کر فوراً مال پہنچا اور پھر ریسکیو آپریشن میں حصہ لیا. میرے ذہن میں کوئی خوف نہیں تھا بس یہ چاہتا تھا کہ کسی طرح اپنے بیٹے اور باقی بچوں کی جان بچا لوں. اسی سوچ کی وجہ سے آگ لگی عمارت میں چلا گیا. اپنے بیٹے سبحان کو دیکھ کر آنکھوں میں آنسو آگئے پھر باقی بچوں کو بچایا اور بیٹے کی بات اس کی ماں سے کروائی"

یہ کہنا ہے محمد عامر کا جن کا بیٹا عبدالسبحان اپنے دوستوں کے ساتھ پلازہ کی چوتھی منزل پر موجود ایک کال سینٹر میں کام کرتا تھا اور گزشتہ روز کراچی کے راشد منہاس روڈ پر شاپنگ مال میں آتشزدگی کے دوران پھنس گیا تھا.

اس بارے میں سبحان نے بتایا کہ ہمیں جیسے ہی پتا چلا کہ آگ لگی ہے سب تیزی سے لفٹ کی طرف بھاگے مگر لفٹ بند تھی. پھر سیڑھیوں کی طرف بھاگے مگر پتا چلا کہ آگ سیڑھیوں کی طرف لگی ہوئی ہے پھر ہم نے خود کو ایک شیشے کے کمرے میں بند کرلیا. جس کے بعد دھواں پھیلتا جا رہا تھا اور ہمارے لیے سانس لینا بھی دشوار ہو رہا تھا۔ ہم کو لگ رہا تھا کہ ابھی دم گھٹ جائے گا، شیشے کے روم میں داخل ہوکر گیلے کپڑے سے چہرے ڈھانپے اور مدد کا انتظار کیا، ابو کو کال کی اور کہا کہ بابا اب ہمارے پاس وقت کم رہ گیا ہے لگتا ہے دھواں جلد جان لے لے گا۔

البتہ بیٹے کا فون سنتے ہی اپنی جان کی پرواہ نہ کرتے ہوئے محمد عامر نے نہ صرف اپنے بیٹے کو بچایا بلکہ 25 اور گھر اجڑنے سے بچا لیے.