کیا! بن میں پان کا مصالحہ؟ سوشل میڈیا پر انوکھا "پان برگر" لوگوں کی توجہ کا مرکز بن گیا، ویڈیو وائرل

پاکستان سمیت ایشیاء کے کئی ممالک میں پان بہت شوق سے کھایا جاتا ہے، خاص کر برصغیر میں۔ اسکے علاوہ آج کل فاسٹ فوڈز وغیر کا بھی رجحان کافی بڑھ گیا ہے، جس کے چلتے کئی بڑی اور لوکل دکانیں کھل گئیں ہیں جہاں سے قسم قسم کے فاسٹ فوڈز آئٹم مل جاتے ہیں، جن میں سب سے زیادہ کھائی جانے والی چیز برگر ہے۔

لیکن کیا آپ نے کبھی برگر اور پان کو ملا کر کھانے کے بارے میں سوچا ہے؟ یقیناً کبھی نہیں!

پر ایک برگر فروش نے نوجوانوں کو اپنی طرف راغب کرنے کیلئے ایسا کیا، اور منفرد اور جدید انداز میں اپنے برگرز تیار کرکے لوگوں کو پیش کئے۔

تفصیلات کے مطابق، حال ہی میں بھارتی شہری کے ٹوئٹر اکاؤنٹ سے شئیر کی گئی ایک ویڈیو سوشل میڈیا پر وائرل ہو رہی ہے جس میں "پان برگر" منفرد انداز میں بنایا جارہا ہے۔

ویڈیو تو وائرل ہوگئی مگر پان والا برگر کو سوشل میڈیا صارفین کی طرف سے خاص پذیرائی نہیں ملی بلکہ اس پر انہوں نے شدید حیرت اور غصے کا اظہار کیا ہے۔

سوشل میڈیا کے مختلف پلیٹ فارمز پر وائرل ویڈیو میں دیکھا جا سکتا ہے کہ سڑک پر برگر فروش برگر کو نئی جدت دیتے ہوئے پان والا برگر تیار کر رہا ہے۔

ویڈیو میں دکاندار کو برگر میں مختلف اجزاء جیسے کہ برفی، چاکلیٹ، چاکلیٹ سیرپ، بادام، مایونیز، پان کا پتا اور مختلف میٹھے مسالے استعمال کرتے ہوئے دیکھا جاسکتا ہے۔

ویڈیو پر کئی صارفین نے ناگواری کا اظہار کیا تو کچھ نے دلچسپ تبصرے کئے۔ ویسے زیادہ تر انٹرنیٹ صارفین اور کھانے پینے کے شوقین افراد کو یہ فوڈ کمبینیشن بالکل پسند نہیں آیا اور انہوں نے اسے کھانے کی توہین قرار دیا۔