شدید ٹھنڈ میں مائیں اپنے بچوں کو کیسے سردی سے بچائیں؟ نئی ماں بننے والی خواتین کے لیے چند اہم طریقے جو آپ کے بچوں کو سردی سے محفوظ رکھیں گے

نئی ماں بننے والی خواتین کے لیے سردیوں میں اپنے بچوں کا خاص خیال رکھنا پڑتا ہے۔ ان کے لیے اپنے بچے یا بچی کو ٹھنڈ سے بچانا اولین کام بن جاتا ہے۔

بچوں کو سردی سے بچانے کے لیے ماؤں کی جانب سے مختلف اقدامات عمل میں لائے جاتے ہیں مگر وہ ناکافی ہوتے ہیں اور کبھی کبھار تو اتنا خیال رکھنے کے باوجود بھی نوزائیدہ یا شیر خوار بچہ بیمار پڑ جاتا ہے۔

پاکستان سمیت دنیا بھر میں بچوں کو ٹھنڈ سے بچانے کیلئے خصوصی انتظامات کیے جاتے ہیں۔ خاص طور پر شیر خوار یا نوزائیدہ بچوں کا تو خاص خیال رکھا جاتا ہے۔

اس حوالے سے برطانیہ کی وزارت صحت کی تجاویز پیش کی جارہی ہیں، جو برطانوی نشریاتی ادارے نے رپورٹ کی ہیں۔

رپورٹ کے مطابق رات کے اوقات میں بچوں کو ایک کے بجائے زیادہ ہلکے پھلکے کمبل سے ڈھانمیں۔

بچوں کو گرم رکھنے کے لیے کپڑوں کی کئی پرتیں پہنانی جانی چاہئیں۔

یہ بات بھی انتہائی اہم ہے کہ بچوں کو رات میں بہت زیادہ گرم کمروں کی ضرورت نہیں ہوتی، 16 سے 20 ڈگری سینٹی گریڈ کے درمیان کمرے کا درجہ حرارت مثالی ہے۔

باہر جاتے وقت اپنے بچے کے سر کو گرم رکھنے کے انتظامات کریں ( سر پر ٹوپی پہنائیں، ہاتھوں میں دستانوں کا استعمال کریں)

گاڑی میں اگر ضروری ہو تو بچوں کے اوپر ایک اضافی کمبل یا کوئی موٹی چادر ڈال سکتے ہیں۔