اچانک حجاب کیوں پہننے لگیں؟ اریج فاطمہ کا نجی زندگی میں بدلاؤ لانے کے متعلق انکشاف

Arij Fatyma Becomes Hijabi Share Struggles

ڈرامہ "حسد" سے لاکھوں دل جیتنے والی اداکارہ اریج فاطمہ، آج ایک مختلف ہی روش پر گامزن ہیں۔ 2019 میں شوبز کو خیرباد کہہ کر انہوں نے زندگی کے ایک نئے باب کا آغاز کیا — ایک ایسا باب جس میں شہرت کی چکاچوند کی جگہ روحانیت اور سکون نے لے لی۔

2017 میں ڈاکٹر عزیر علی کے ساتھ رشتہ ازدواج میں منسلک ہونے والی اریج، شادی کے بعد ہالینڈ منتقل ہو گئیں جہاں وہ اب اپنے دو ننھے شہزادوں کی ماں بن کر ایک پُرسکون خاندانی زندگی گزار رہی ہیں۔

حالیہ دنوں، اریج نے انسٹاگرام پر ایک ویڈیو پوسٹ کی جس میں وہ مکمل حجاب میں نظر آئیں۔ اس پوسٹ کو عنوان دیا گیا "نئی شروعات" لیکن یہ صرف ایک لباس کی تبدیلی نہیں تھی یہ دل کی گہرائیوں سے نکلنے والا ایک روحانی اعلان تھا۔

انہوں نے اپنی پوسٹ میں دل کی بات کہی، "جیسے ہی میں نے حجاب لینا شروع کیا، کچھ لوگوں نے خود کو میرا رہنما سمجھ لیا۔ انباکس میں نصیحتوں اور تبصروں کی لائن لگ گئی۔ لیکن میں صرف وہی کروں گی جو میرا دل اور میری رب کی ہدایت مجھے بتائے گی۔"

ان کا مزید کہنا تھا، "حجاب لینے کے لیے نہ مجھے کسی کی اجازت چاہیے، نہ رائے۔ یہ میرے اور میرے رب کے درمیان کا معاملہ ہے۔ ماشاءاللّٰہ، لا قوۃ الا باللّٰہ!"

اریج کی اس روحانی تبدیلی نے سوشل میڈیا پر ایک نیا ہنگامہ برپا کر دیا۔ کچھ مداح ان کے عزم سے متاثر نظر آئے، تو کچھ نے اپنی آراء کو تنقید کے رنگ میں ڈھالا۔ لیکن ایک بات طے ہے،اریج اب پہلے سے کہیں زیادہ پُراعتماد، پُرسکون اور اپنے رب کے قریب دکھائی دے رہی ہیں۔