شادی کے 29 سال بعد والدین کی طلاق پر اے آر رحمٰن کے بچوں نے کیا کہا؟

بالی وڈ کے معروف موسیقار اور گلوکار اے آر رحمان اور ان کی اہلیہ سائرہ بانو کی 29 سالہ رفاقت کے بعد طلاق نے سب کو چونکا دیا۔ سائرہ بانو نے 19 نومبر کی شب اس خبر کا اعلان کیا جس کے فوراً بعد رحمان نے بھی اپنے ایکس (سابق ٹوئٹر) اکاؤنٹ پر اس بات کی تصدیق کی۔

اس علیحدگی کے بعد رحمان کے بچوں کے ردِعمل بھی سامنے آئے ہیں۔ تینوں بچوں نے اپنی انسٹاگرام اسٹوریز میں اپنے جذبات کا اظہار کیا اور لوگوں سے درخواست کی کہ اس حساس موقع پر ان کی نجی زندگی کا احترام کیا جائے۔

اے آر رحمان کے بیٹے اے آر امین نے اپنے پیغام میں لکھا، "ہم آپ سب سے گزارش کرتے ہیں کہ اس وقت ہماری پرائیویسی کا احترام کریں۔ آپ سب کا ہماری صورتحال کو سمجھنے کے لیے شکریہ۔"

اسی طرح، ان کی بڑی بیٹی خدیجہ رحمان نے بھی اپنے بھائی کی اسٹوری کو شیئر کرتے ہوئے اس پیغام کو مزید پھیلایا۔ رحمان کی چھوٹی بیٹی رحیمہ نے بھی اپنی انسٹاگرام اسٹوری پر یہ پیغام دیا، "آپ سب سے گزارش ہے کہ اس صورتحال کو سمجھیں اور ہماری نجی زندگی کی عزت کریں۔"

واضح رہے کہ اے آر رحمان اور سائرہ بانو کی شادی 12 مارچ 1995 کو ہوئی تھی۔ یہ ارینج میرج رحمان کی والدہ کے کہنے پر انجام پائی تھی۔ ان کے تین بچے ہیں، جو اس علیحدگی کے باوجود ایک مضبوط خاندانی رشتے کو قائم رکھنے کے لیے کوشاں نظر آتے ہیں۔

اس علیحدگی نے کئی لوگوں کو سوچنے پر مجبور کر دیا کہ محبت، کامیاب کیریئر، اور خاندانی وابستگیوں کے باوجود بعض اوقات تعلقات میں ایسا موڑ بھی آ سکتا ہے۔ رحمان کے خاندان کی درخواست ہے کہ ان کی اس مشکل گھڑی میں ان کی نجی زندگی کا احترام کیا جائے اور انہیں سکون سے اس صورتحال سے نمٹنے کا موقع دیا جائے۔