بستر مرگ پر بچوں کو اضافی نمبر دیے اور ۔۔ مرنے سے قبل اسپتال کے بستر سے اسائنمنٹ کے نمبر دیتے ہوئے ٹیچر کی تصویر وائرل

اسکول کا ٹیچر بچوں کی تعلیم اور انہیں کامیابی کے مقام تک پہنچانے کے لیے خود کو وقف کر دیتا ہے۔ ایک محنت کش ٹیچر کی کامیابی ہی یہ ہوتی ہے کہ اس کے طالب علم سالوں تک انہیں یاد رکھیں۔

ایسے ہی ایک اسکول ٹیچر کی تصویر سوشل میڈیا پر صارفین کی خاص توجہ کا مرکز بن رہی ہے جس میں وہ اسپتال کے بستر پر موجود لیپ ٹاپ پر بچوں کو نمبر دے رہے ہیں۔

مذکورہ ٹیچر کی محنت اور اپنے پیشے کی طرف ایمانداری صاف دکھائی دے رہی ہے۔

سندرا وینیگس نامی خاتون نے اسپتال کے بستر پر کام کرتے اپنے والد کی یہ تصویر کھینچی اور اسے سوشل میڈیا پر شیئر کیا تاکہ لوگوں کو پتا چل سکے کہ ایک استاد کیا کیا قربانیاں دیتا ہے اور اپنے پیشے سے کتنا لگاؤ رکھتا ہے۔

صحت کے سنگین مسائل کے باوجود علیل استاد نے اپنا لیپ ٹاپ اور چارجر پیک کرنے کے لیے وقت نکالا، یہ جانتے ہوئے کہ وہ ایمرجنسی روم میں جا رہے ہیں، انہوں نے بسترِ مرگ پر اپنے تمام شاگردوں کو اسائنمنٹ کے نمبرز دیے۔

اگلے روز جب ٹیچر کا انتقال ہوا تو ان کی بیٹی نے یہ تصویر سوشل میڈیا پر پوسٹ کی جس کے کیپشن میں لکھا تھا کہ ٹیچرز اپنی نوکری کے اوقات کار کے علاوہ بھی بچوں کے لیے اپنی نجی زندگی میں وقت نکالتے ہیں لیکن انہیں کوئی نہیں سراہتا۔

سندرا نے لکھا 'اساتذہ اتنے اضافی گھنٹے لگاتے ہیں، اس وقت کا بہت سے لوگوں کو احساس نہیں ہوتا، یہاں تک کہ انہوں نے کورونا میں بھی بچوں کو تعلیم دینا نہیں چھوڑی تھی۔

سندرا وینیگس کی یہ پوسٹ وائرل ہوچکی ہے جس پر صارفین بڑی تعداد میں ٹیچر کی خدمات کو سراہ رہے ہیں، ساتھ ہی کچھ لوگوں نے سندرا سے ان کے والد کے انتقال پر تعزیت بھی کی۔