عورتین زبان چلائیں گی تو مرد ہاتھ ہی اٹھائے گا۔۔ ڈاکٹر نبیہا علی کا متنازعہ بیان صارفین کو بھڑکا گیا

Dr Nabiha Blames Women For Marital Domestic Violence

ڈاکٹر نبیہا علی خان، جو ماہرِ نفسیات ہونے کے ساتھ ساتھ اپنی متنازع رائے اور مرد حامی مؤقف کے باعث شہرت رکھتی ہیں، ایک بار پھر سوشل میڈیا پر تنقید کی زد میں آ گئی ہیں۔ مارننگ شوز میں شادی، تعلقات اور ذہنی صحت پر گفتگو کرنے والی ڈاکٹر نبیہا اس بار 'قطب آن لائن' کی مہمان بنیں، مگر اُن کے بیانات نے انٹرنیٹ پر طوفان برپا کر دیا۔

گھریلو تشدد پر بات کرتے ہوئے انہوں نے کہا کہ، "مرد اپنی انا اور تنخواہ پر کبھی سمجھوتہ نہیں کرتا۔ عورت اگر ان میں سے کسی پر ہاتھ ڈالے تو وہ برا مان جاتا ہے۔ چاہے مرد غلط ہو یا سخت مزاج، وہ بیوی پر ہاتھ اُس وقت اُٹھاتا ہے جب جھگڑا حد سے بڑھ جائے۔ عورت اگر تلخ الفاظ کہے تو مرد بھی جواب میں تلخی دکھاتا ہے اور آخرکار تھپڑ مار دیتا ہے۔ اکثر بیویاں اپنے شوہروں کو مارنے پر اُکسا دیتی ہیں۔"

یہ جملے اس وقت سامنے آئے جب حال ہی میں عائشہ جہانزیب اور جیسمین منظور جیسی معروف شخصیات کے ساتھ گھریلو تشدد کے کیسز رپورٹ ہوئے۔

بیان نشر ہوتے ہی سوشل میڈیا پر ہنگامہ مچ گیا۔ ایک صارف نے لکھا، "لگتا ہے انہوں نے تشدد کو زندگی کا عام حصہ سمجھ لیا ہے، شاید خود کسی وقت متاثر ہوئی ہوں یا ایسی دنیا میں رہی ہوں جہاں حقیقت کا سامنا نہیں ہوا۔" دوسرے نے کہا، "میں گھریلو تشدد کا شکار رہ چکی ہوں، اس عورت کی باتیں قابلِ نفرت ہیں۔" ایک اور کمنٹ آیا، "سوچیں جب ایسی خواتین آئندہ نسل کے مردوں کی تربیت کریں گی تو کیا حال ہوگا۔"

انٹرنیٹ پر بحث جاری ہے، اور ڈاکٹر نبیہا کے الفاظ نے ایک بار پھر یہ سوال کھڑا کر دیا ہے کہ کیا بعض ذہنی صحت کے ماہر بھی معاشرتی رویوں کے قیدی بن جاتے ہیں؟