اچھا سوچا پھر بھی برائی ملی۔۔ کینسر کے بارے میں آگاہی پھیلانے پر تنقید کیوں؟ سونالی باندرے پھٹ پڑیں

Sonali Bendre Defends Crediting Naturopathy In Cancer Recovery Amid Backlash

بالی ووڈ کی معروف اداکارہ سونالی باندرے ایک بار پھر توجہ کا مرکز بن گئی ہیں۔ حال ہی میں انہوں نے انکشاف کیا کہ کینسر سے صحت یابی کے سفر میں نیچروپیتھی نے ان کی بھرپور مدد کی— اس بیان نے سوشل میڈیا پر بحث چھیڑ دی۔

90 کی دہائی میں شہرت کی بلندیوں کو چھونے والی سونالی باندرے 2018 میں اسٹیج 4 میٹاسٹیٹک کینسر میں مبتلا ہوئیں، ایک ایسا مرحلہ جسے سن کر اکثر لوگوں کے قدم لرز جاتے ہیں۔ لیکن اداکارہ نے ہمت نہیں ہاری اور 2021 میں اس جان لیوا بیماری کو شکست دے کر ایک نئی زندگی کی طرف لوٹ آئیں۔

لیکن سونالی نے جب اپنا مشکل سفر اور علاج کا طریقہ اپنے مداحوں سے شیئر کیا تو کافی لوگوں نے انہیں تنقید کا نشانہ بنایا۔

جس کا جواب دیتے ہوئے انہوں نے واضح کیا کہ، انہوں نے کبھی بھی خود کو ڈاکٹر کے طور پر پیش نہیں کیا۔ ان کے مطابق میں ماہر نہیں، لیکن میں وہ انسان ہوں جس نے اس درد، خوف اور جدوجہد کو اپنی پوری شدت سے محسوس کیا ہے۔ میرا ہر لفظ میرے ذاتی سفر اور سیکھنے کا نتیجہ ہے۔

سونالی کا کہنا تھا کہ، ہر مریض کا کیس مختلف ہوتا ہے، کینسر کی نوعیت بھی ایک جیسی نہیں ہوتی اور علاج کا راستہ بھی ہر فرد کے لیے جدا ہوتا ہے۔ میرے معاملے میں نیچروپیتھی نے میرا ساتھ دیا، اور میں نے وہی بات شیئر کی جو میں نے خود جِھیلا، محسوس کیا اور سمجھا۔

انہوں نے یہ بھی کہا کہ، ضروری نہیں ہر کوئی ان کی سوچ سے اتفاق کرے، لیکن اختلاف رائے کا یہ مطلب نہیں کہ دوسروں کے تجربات کو رد کر دیا جائے۔

ہر انسان کو اپنی صحت کے بارے میں وہی راستہ چننا چاہیے جو اسے محفوظ، مؤثر اور مضبوط بنائے۔ میں ہمیشہ اپنے سفر کے بارے میں سچ بولوں گی۔

سونالی باندرے کے مطابق وہ صحت یابی کے دوران بھی نیچروپیتھی پر ریسرچ کرتی رہیں اور عملی طور پر اسے اپناتی رہیں—اور آج بھی وہ اسی طرزِ زندگی کو برقرار رکھے ہوئے ہیں۔

ان کی یہ کھلی گفتگو نہ صرف ان کے حوصلے کی عکاس ہے بلکہ ان بے شمار لوگوں کے لیے حوصلہ افزا پیغام بھی ہے جو بیماری کے مشکل مرحلوں سے گزر رہے ہیں۔