شاترہ کا جوشاندہ کئی بیماریوں کا بہترین علاج ہے ۔۔ جانیئے شاترہ کا جوشاندہ بنانے کا طریقہ اور اس کے حیرت انگیز فوائد

شاترہ ایک پودا ہے جو موسمِ بہار میں کھیتوں باغات اور سڑکوں کے کنارے اُگتا ہے گاؤں وغیرہ میں رہنے والے افراد اس پودے کو بخوبی پہچانتے ہیں اور اس کے فوائد سے بھی واقف ہوتے ہیں، شاترہ کے پھول پتے اور شاخیں سب ہی طبی فوائد سے بھرپور ہوتی ہیں۔
شاترہ کے بےشمار فوائد میں خون صاف کرنا اور بخار اُتارنا شامل ہے، یہ جگر کے لئے بھی مفید ہے اس کا جوشاندہ بنا کر استعمال کیا جاتا ہے جو کئی قسم کی بیماریوں سے دور رکھنے کے لئے بہترین ہوتا ہے شاترہ کے دیگر فوائد درج ذیل ہیں۔

• شاترہ کے حیرت انگیز فوائد

• بخار میں مفید

اگر بخار نہ اُتر رہا ہو تو ایسے میں شاترہ کا استعمال مفید ہے بخار کے مریض کو اگر شاترہ کا جوشاندہ بنا کر دیا جائے تو اس سے فوری پسینہ آنے لگے گا اور جسم کا درجہ حرارت کم ہو کر بخار اُتر جائے گا۔

• خون صاف کرنے کے لئے مفید

شاترہ کا ذائقہ تلخ ہوتا ہے یہ جسم میں فلٹر کا کام کرتے ہوئے خون کو فلٹر کرتا ہے اور خون سے فاسد مادوں، زیریلے مادوں اور گندگی کو صاف کر کے خون کو صاف کرتا ہے، شاترہ کا جوشاندہ باقاعدگی سے استعمال کرنے سے کچھ ہی دنوں میں خون صاف ہونے لگا اور یوں نہ صرف صحت بہتر ہوگی بلکہ جلد میں بھی نکھار آئے گا۔

• جگر کے امراض میں مفید

شاترہ جگر کے امراض سے نجات دلانے کے لئے بھی جانا جاتا ہے، یہ جگر کے افعال کو بہتر بناتا ہے جس سے جگر کی کارکردگی میں بہتری آتی ہے ساتھ ہی یہ جگر کو کئی قسم کے مسائل اور بیماریوں سے دور رکھتا ہے۔

• منہ کے چھالوں سے نجات

شاترہ کو منہ کے چھالے دور کرنے کے لئے بھی استعمال کیا جاتا ہے، چاہیں تو سوکھے شاترہ کو منہ میں لے کر چوس لیں یا پھر شاترہ کا جوشاندہ بنا کر اس سے کلیاں کریں تو منہ کے چھالے دور ہو جائیں گے۔

• شاترہ کا جوشاندہ بنانے کا طریقہ

ایک گلاس پانی میں 4 گرام شاترہ ڈال کر اسے 10 سے 15 منٹ بلکل دھیمی آنچ پر پکائیں اب جب یہ پانی آدھا گلاس رہ جائے تو چولہا بند کر دیں اور اسے چھان کر کپ میں نکال لیں اب اس میں ایک چمچ شہد ملائیں اور پی لیں۔