اپنے ہوش کھونے لگی تھی۔۔ ماں کی قربانیاں باپ سے زیادہ ہوتی ہیں ! ثانیہ مرزا نے بیٹے کی پرورش میں کیا کچھ سہا؟ پہلی بار بول پڑیں

Sania Mirza On Parenting And Mother Role

جب کوئی ثانیہ مرزا کا نام سنتا ہے تو ذہن میں ایک باہمت، نڈر اور کامیاب کھلاڑی کا تصور آتا ہے، لیکن اپنے حالیہ انٹرویو میں انہوں نے وہ پہلو دکھایا جو اکثر دنیا کی نظروں سے اوجھل رہتا ہے— ایک ماں کی خاموش جدوجہد۔

ثانیہ مرزا نے ماں بننے کے تجربے پر کھل کر بات کی۔ اگرچہ اُن کا کہنا تھا کہ، مجموعی طور پر اُن کی پریگننسی ایک خوشگوار سفر تھا، لیکن اصل چیلنج اس کے بعد شروع ہوا۔

ایک کام کرنے والی ماں کی حیثیت سے انہوں نے بتایا کہ ان پر ناقابلِ بیان دباؤ تھا۔ نیند کی کمی، وقت کی قلت اور مسلسل تھکن جیسے مسائل نے انہیں اندر سے توڑ کر رکھ دیا تھا۔ ہر لمحہ بس اسی فکر میں گزرتا کہ اگلا فیڈ کب دینا ہے، میں واقعی ایک موقع پر اپنے حواس کھونے کے قریب پہنچ گئی تھی۔

تین مہینے کی مسلسل تھکن کے بعد جب ثانیہ نے بچوں کے ڈاکٹر سے کہا کہ وہ مزید نہیں سہہ سکتیں، تو انہیں مشورہ ملا کہ صرف ایک مہینہ اور برداشت کریں۔ لیکن ثانیہ نے صاف کہہ دیا: نہیں، اب بس۔۔۔

ان کا کہنا تھا کہ وہ اس حد تک جذباتی تھکن کا شکار ہو چکی تھیں کہ اکثر یہ سوچ کر دل دہل جاتا کہ اگر وہ نہ رہیں، تو ان کے بیٹے کا کیا ہوگا؟ یہ صرف جسمانی تھکن نہیں تھی، یہ ماں کے دل کی وہ بے بسی تھی جو لفظوں میں بیان نہیں ہو سکتی۔

ثانیہ نے وہ لمحہ بھی یاد کیا جب اذہان کی پیدائش کے صرف چھ ہفتے بعد انہیں کام کے لیے بیرونِ ملک جانا پڑا۔ فلائٹ میں دودھ پمپ کرتے ہوئے انہیں ایسا محسوس ہوا جیسے انہوں نے کچھ قیمتی پیچھے چھوڑ دیا ہو۔ ماں بننے کے بعد دل کے دو ٹکڑے ہو جاتے ہیں— ایک اپنے بچے کے ساتھ رہ جاتا ہے، دوسرا دنیا کا سامنا کرتا ہے۔

انہوں نے صاف کہا کہ، دنیا میں کہیں بھی چلے جائیں، والدین کے فرائض برابر نہیں ہوتے۔ یہ برابری کی دنیا نہیں ہے۔ ماں کو فطری طور پر زیادہ قربانیاں دینی پڑتی ہیں، زیادہ وقت، زیادہ جذبہ، زیادہ تھکن— یہ سب کچھ خاموشی سے سہنا پڑتا ہے۔

یہ بھی یاد رہے کہ ثانیہ اور پاکستانی کرکٹر شعیب ملک کے ہاں 2018 میں اذہان کی پیدائش ہوئی تھی۔ اب، جب ثانیہ نے پروفیشنل ٹینس کو خیر باد کہہ دیا ہے، تو ان کا مکمل دھیان اپنے بیٹے کی پرورش پر ہے۔ ان کا کہنا تھا، میں چاہتی تھی کہ اس کے بچپن کے لمحے میری نظروں کے سامنے ہوں، کیونکہ یہ وقت واپس نہیں آتا۔

ثانیہ مرزا کی یہ کہانی صرف ایک عالمی کھلاڑی کی نہیں، بلکہ ہر اُس ماں کی آواز ہے جو خاموشی سے اپنے بچوں کے لیے دن رات ایک کر دیتی ہے— اور بدلے میں صرف ایک مسکراہٹ چاہتی ہے۔