ماہواری کی شدت دل کی بیماری میں تبدیل ہو سکتی ہے؟ ماہرین کی نئی تحقیق نے خواتین کے لیئے خطرے کی گھنٹی بجا دی

ماہواری کسی بھی عورت کے لیئے ایک تکلیف دہ مرحلہ ہوتا ہے جس سے اسے ہر ماہ گزرنا پڑتا ہے، کچھ خواتین کو اس میں کم تکلیف ہوتی ہے جبکہ کچھ کو حد سے زیادہ درد ہوتا ہے۔

لیکن آج تک ہم یہی سنتے آئے ہیں کہ یہ ایک دو دن کا درد ہوتا ہے اس سے کچھ نہیں ہوتا، کوئی بیماری نہیں ہے فلاں فلاں۔۔ مگر اب غیر ملکی طبی ماہرین کی ایک تحقیق نے سب کو حیرت میں ڈال دیا، آئیے آپ کو بھی اس سے آگاہ کرتے ہیں۔

امریکی ماہرین نے ایک طویل حالیہ تحقیق سے معلوم کیا ہے کہ، جن خواتین کو ماہواری کے دوران تکلیف کا سامنا رہتا ہے، ان میں مختلف طبی پیچیدگیاں ہونے لگتی ہیں جو طویل عرصے بعد امراض قلب میں تبدیل ہو سکتی ہیں۔

ویسے تو تکلیف دہ ماہواری کا سامنا کرنے والی خواتین کو عام طور پر بچے دانی میں درد، سوزش اور انتہائی چھوٹے غیر کینسر شدہ غدود پیدا ہونے جیسے مسائل کا سامنا ہوتا ہے۔ اور اس کے علاوہ ان میں کمر درد، ٹانگوں کا درد اور بلڈ پریشر کے مسائل بھی شامل ہیں۔

پیریڈز اور امراض قلب سے تعلق جانچنے کے لیے امریکی ماہرین نے دو مختلف تحقیقات کیں جس سے ثابت ہوا کہ، تکلیف دہ ماہواری کا سامنا کرنے والی خواتین میں دل کے امراض ہونے کے امکانات بڑھ جاتے ہیں۔

ماہرین کے مطابق، اگرچہ نوعمری یا نوجوانی میں تکلیف دہ ماہواری سے امراض قلب پیدا ہونے کے شواہد نہیں ملے، تاہم اس عمل کے مسلسل ہونے سے پیدا ہونے والی طبی پیچیدگیاں زائد العمری میں امراض قلب کا سبب بن سکتی ہیں۔ ساتھ ہی انہوں نے اس پر مزید تحقیق کرنے کی تجویز بھی پیش کی ہے تا کہ کوئی بھی شک و شبہ باقی نہ رہے۔