باجی مجھے بہت مارا۔۔ کم سن ملازمہ پر تشدد کیس میں آواز بلند کرنے والی نادیہ جمیل سے رضوانہ نے کیا فرمائش کی کہ وہ جذباتی ہوگئیں؟

چھوٹے بچوں کو ملازم رکھتے ہوئے لوگ سوچتے نہیں کہ ان کے بھی کچھ خواب ہوتے ہیں۔ وہ ویسے ہی جذبات رکھتے ہیں جیسے ہمارے گھر کے بچوں کے ہوتے ہیں۔ ان کو بھی اسی پیار اور توجہ کی ضرورت ہوتی ہے جیسے ہمارے اپنے بچوں کو ہوتی ہے۔ لاہور میں کم س رضوانہ کے ساتھ ایسا واقعہ پیش آیا ہے جس نے پوری قوم کو جھنجھوڑ کر رکھ دیا ہے۔ ایسے میں سب سے پہلے نادیہ جمیل نے رضوانہ کے حق میں آواز اٹھائی ہے۔

“بچی کی کوئی تصویر نہیں شئیر کروں گی نہ اس کی حالت بتا سکتی ہوں۔ وہ بہت درد میں تھی اسے بری طرح مارا پیٹا گیا ہے اور وہ شدید زخمی ہے۔ اس کے سر میں بہت درد تھا“

یہ کہنا ہے معروف ادکارہ نادیہ جمیل کا جنھوں نے لاہور میں تشدد کا نشانہ بننے والی گھریلو کم سن ملازمہ رضوانہ سے گزشتہ روز ملاقات کی۔ نادیہ ملاقات کا احوال “ایکس“ پر شئیر کرتے ہوئے لکھتی ہیں کہ جب ہم نے رضوانہ سے پوچھا کہ اسے کیا چاہیے تو اس کی آنکھیں چمک اٹھیں اور اس نے کہا کہ “مجھے گڑیا چاہیے“

نادیہ کہتی ہیں کہ رضوانہ کی مسکراہٹ دیکھ کر ان کا دل ٹوٹ گیا۔ رضوانہ نے انھیں دیکھ کر کہا “بہت مارا باجی بہت مارا“

نادیہ جمیل نے مزید لکھا کہ ہم جانے سے پہلے رضوانہ کو کوئی امید دینا چاہتے تھے اس لئے ہم نے اسے بتایا کہ ہم اس کے لئے لڑ رہے ہیں۔ جانے سے پہلے ہم نے اس سے کچھ باتیں کیں۔ رضوانہ نے بتایا کہ وہ اپنی گڑیا کا نام ڈولی رکھنا چاہتی ہے اور اس کو چاکلیٹ کیک کھانا بہت پسند ہے۔

نادیہ جمیل پوسٹ کے اختتام میں لکھتی ہیں کہ وہ تصور کرتی ہیں رضوانہ کے پاس وہ کھلونے اور کھانے موجود ہیں جو اس نے اپنے آس پاس کے امیر بچوں کے پاس دیکھے تھے۔ وہ آخر کار ایک چھوٹی بچی ہے اور وہ خوش رہنا چاہتی ہے، کھیلنا چاہتی ہے، مسکرانا چاہتی ہے۔ براہ کرم اس کی مسکراہٹ کی حفاظت کریں! برائے مہربانی. اس کی مسکراہٹ دیکھ کر میرے دل کو سکون ملا، لیکن اس کی چوٹیں دیکھ کر وہ بکھر گیا۔“