مولی کے پراٹھے کھانے سے جسم میں کیا تبدیلی آتی ہے؟ جانیں اسے بنانے کا طریقہ اور موسی سبزی کے ڈھیروں فائدے

Mooli Kay Parathay Recipe And Benefits

سردیوں کا موسم آتے ہی دسترخوان پر مولی کے پراٹھے کی خوشبو پھیل جاتی ہے۔ گرم، کرارا پراٹھا جب دہی یا لسی کے ساتھ کھایا جائے تو مزہ دوبالا ہو جاتا ہے۔ مگر کیا آپ جانتے ہیں کہ مولی کے پراٹھے صرف ذائقے کے لیے نہیں بلکہ صحت کے لیے بھی بہت فائدہ مند ہیں؟ یہ موسمی سبزی ہمارے جسم کو اندر سے مضبوط بناتی ہے اور کئی بیماریوں سے بچاتی ہے۔

مولی کے غذائی فائدے

مولی میں فائبر، وٹامن سی، پوٹاشیم، کیلشیم اور آئرن پایا جاتا ہے۔ یہ معدے کو صاف کرتی ہے، ہاضمہ بہتر بناتی ہے اور جگر کی کارکردگی کو مضبوط کرتی ہے۔ مولی میں پانی کی مقدار زیادہ ہوتی ہے، جو جسم سے زہریلے مادے نکالنے میں مدد دیتی ہے۔ جو لوگ وزن کم کرنا چاہتے ہیں، ان کے لیے مولی بہترین سبزی ہے کیونکہ یہ پیٹ بھر دیتی ہے مگر کیلوریز کم رکھتی ہے۔

مولی کے پراٹھے کے حیرت انگیز فائدے

مولی کا پراٹھا کھانے سے نظامِ ہاضمہ بہتر ہوتا ہے اور قبض جیسی عام شکایت دور رہتی ہے۔ اس میں موجود اینٹی آکسیڈنٹس جسم سے فاضل مادے خارج کرتے ہیں اور جلد کو صاف رکھتے ہیں۔ سردیوں میں مولی جسم کو قدرتی طور پر گرم رکھتی ہے اور قوتِ مدافعت کو مضبوط بناتی ہے۔ جو لوگ گیس، سینے کی جلن یا بھاری پن محسوس کرتے ہیں، ان کے لیے ناشتے میں مولی کا پراٹھا بہت مفید ثابت ہوتا ہے۔ البتہ کسی مرض کے شکار افراد کو پراٹھوں سے گریز کرنا چاہئیے اور ڈاکٹر سے لازمی رجوع کرنا چاہئیے

مولی کا پراٹھا بنانے کا آسان طریقہ

مولی کو چھیل کر باریک کدو کش کریں اور اس میں نمک، ہری مرچ، ہرا دھنیا اور تھوڑا سا زیرہ پاؤڈر ملا لیں۔ آٹے کا پیڑا بنائیں، اس میں مولی کا مکسچر بھریں اور ہلکے ہاتھ سے بیل لیں۔ اب گرم توے پر پراٹھا سنہری ہونے تک پکائیں، دونوں طرف ہلکا گھی یا تیل لگائیں تاکہ کرسپی بن جائے۔ دہی یا اچار کے ساتھ گرم گرم پیش کریں۔

مولی کا پراٹھا نہ صرف ذائقے دار ناشتہ ہے بلکہ یہ سردیوں کے دنوں میں صحت بخش توانائی بھی فراہم کرتا ہے۔ روزمرہ کی خوراک میں اسے شامل کریں اور موسم کے ساتھ جسم کو بھی تندرست رکھیں۔