میری اکلوتی بیٹی تھی ظالموں نے وہ بھی چھین لی ۔۔ نئے سال پر ہوائی فائرنگ سے معصوم بچی زخموں کی تاب نہ لاتے ہوئے والدین سے بچھڑ گئی

کراچی میں سال نو پر ہوائی فائرنگ سے زخمی ہونے والی کمسن بچی دم توڑ گئی۔

تفصیلات کے مطابق کراچی کے علاقے کورنگی میں نئے سال کے جشن پر ہوائی فائرگ سے 5 سالہ بچی ثانیہ جاں بحق ہوگئی جس کے بعد اہلخانہ پر قیامت ٹوٹ پڑی۔ بچی اسپتال میں زخموں کی تاب نہ لاتے ہوئے انتقال کر گئی۔

ایس ایس پی کورنگی کا کہنا ہے کہ کورنگی ایک نمبر اور اطراف میں سرچ آپریشن کررہے ہیں۔

انہوں نے بتایا کہ مخصوص گلیوں اور گھروں کی تلاشی لے رہے ہیں، گزشتہ روز بھی ہوائی فائرنگ کے ملزم کو اسی مقام سے گرفتار کیا تھا۔

ایس ایس پی کے مطابق کورنگی سے ہوائی فائرنگ کرنے والے 11 ملزمان کو گرفتارکیا جاچکا ہے۔

بچی کے والد کا کہنا ہے کہ ثانیہ سو رہی تھی والدہ کچن میں کام کررہی تھی، بچی کو جھولے سے نکالا تو سر سے خون بہہ رہا تھا۔

انہوں نے بتایا کہ بچی کو سندھ گورنمنٹ اسپتال لے کر گئے، پٹی کرکے فوری جناح اسپتال منتقل کرنے کا کہا گیا، جہاں ڈاکٹر نے کہا بچی کے دماغ میں گولی پھنسی ہوئی ہے۔

والد نے کہا کہ چوبیس گھنٹے کا الٹی میٹم دیا ہوش میں آنے کے بعد آپریشن کا کہا گیا، میری اکلوتی بیٹی تھی ظالموں نے وہ بھی چھین لی۔

واضح رہے کہ ریسکیو حکام کا کہنا تھا کہ سال نو کے موقع پر کراچی کے مختلف علاقوں میں ہوائی فائرنگ سے 30 افراد زخمی ہوگئے ہیں۔

پولیس کے مطابق ہوائی فائرنگ سے زخمی ہونے والوں میں خواتین اور بچے بھی شامل ہیں جبکہ مختلف علاقوں میں ہوائی فائرنگ کے الزام میں گرفتار افراد کی تعداد 65 ہوگئی ہے۔