میرا حمل بھی ضائع کروا دیا اور ۔۔ بیوی کو نورا فتیحی جیسا بنانے کے جنون میں شوہر نے کون سی حدیں پار کر دیں؟

Man Wanted WifeTo Be Nora Fatehi

غازی آباد سے ایک چونکا دینے والی کہانی سامنے آئی ہے، جہاں ایک عورت نے اپنے شوہر پر ایسا الزام لگا دیا جس نے سوشل میڈیا کو ہلا کر رکھ دیا۔

کہانی کی جڑ بالی وُوڈ کی مشہور ڈانسر اور اداکارہ نورا فتیحی ہیں۔ خاتون کا دعویٰ ہے کہ اس کا شوہر، جو کہ ایک سرکاری فزیکل ایجوکیشن ٹیچر ہے، نورا کے عشق میں اس قدر اندھا ہو گیا کہ اپنی بیوی کو زبردستی اُس جیسا بننے پر مجبور کرنے لگا۔

شکایت میں لکھوایا گیا کہ شادی کے بعد سے ہی شوہر اور سسرال والے قد، رنگت اور شکل پر طعنے کستے رہے۔ شوہر روزانہ 3 گھنٹے ورزش کرنے کا حکم دیتا، اور اگر بیوی کبھی یہ نہ کر پاتی تو سزا کے طور پر کھانا بند کر دیا جاتا۔ شوہر کا کہنا تھا کہ وہ نورا جیسی حسین لڑکی سے بھی شادی کر سکتا تھا۔

خاتون نے الزام لگایا کہ سوشل میڈیا پر شوہر کا رجحان ہمیشہ دوسری عورتوں کی نازیبا تصاویر اور ویڈیوز دیکھنے کی طرف رہتا۔ یہاں تک کہ جب وہ حاملہ ہوئی تو شوہر نے خفیہ طور پر اسقاطِ حمل کی گولیاں بھی دے ڈالیں۔

کہانی صرف یہیں ختم نہیں ہوئی۔ متاثرہ خاتون کا کہنا ہے کہ شادی کے وقت اُس کے گھر والوں نے زیورات، قیمتی گاڑی اور لاکھوں روپے نقدی دی تھی۔ کل ملا کر تقریباً 76 لاکھ روپے خرچ ہوئے، لیکن پھر بھی جہیز کے مطالبے اور ذہنی و جسمانی اذیت کا سلسلہ ختم نہ ہوا۔

اب پولیس نے مقدمہ درج کرتے ہوئے شوہر سمیت ساس، سسر اور نند کے خلاف تحقیقات کا آغاز کر دیا ہے۔

یہ معاملہ صرف ایک گھر کا نہیں لگتا، بلکہ ایک ایسے ذہنی رویے کی تصویر ہے جس نے رشتوں کی بنیاد کو ہلا کر رکھ دیا ہے۔