سوال ہی نہیں پیدا ہوتا، اللہ نہ کرے۔۔ فردوس جمال نے بیوی سے طلاق کی خبروں کی تردید کرتے ہوئے بیٹے کو ہی جھوٹا بنا دیا! ویڈیو

"ایسی کوئی بات نہیں ہے، سوال ہی پیدا نہیں ہوتا۔ اللہ نہ کرے، اس عمر میں میں کیا کروں گا؟ میرے بچے بڑے ہیں، سب شادی شدہ ہیں اور میں دادا ہوں۔ میرے بچے اور اہل خانہ میری ذات کا حصہ ہیں،" – فردوس جمال

سینئر اداکار فردوس جمال نے اپنی اہلیہ سے خلع کی افواہوں پر خاموشی توڑ دی۔ مقامی صحافی سے بات کرتے ہوئے فردوس جمال نے خلع کی خبروں کو یکسر مسترد کر دیا۔ ان کے بیٹے حمزہ جمال کی جانب سے جاری کی گئی ویڈیو میں دعویٰ کیا گیا تھا کہ ان کی والدہ نے 40 سال بعد فردوس جمال سے علیحدگی لے لی ہے۔

حمزہ نے اپنی ویڈیو میں انکشاف کیا کہ ان کے والد نے ہمیشہ شکایت کی کہ ان کی شادی صحیح جگہ پر نہیں ہوئی، اور وہ اپنی والدہ کے ساتھ نہیں رہنا چاہتے تھے۔ یہ ویڈیو اس وقت سامنے آئی جب حالیہ ہفتوں میں فردوس جمال کے کئی بیانات وائرل ہو چکے ہیں۔

تاہم فردوس جمال نے اس سوال کا جواب دیتے ہوئے واضح کیا کہ ایسی کوئی بات نہیں اور مسکراتے ہوئے کہا، "اللہ نہ کرے، اس عمر میں کیا کریں گے؟" ساتھ ہی انہوں نے یہ بھی کہا کہ ان کے بچے اور اہل خانہ ان کی زندگی کا حصہ ہیں۔

ویڈیو کے بعد لوگوں میں اس معاملے پر چہ مگوئیاں ہونے لگیں کہ آخر حمزہ نے ایسے وقت میں یہ ویڈیو کیوں جاری کی؟ تاہم فردوس جمال نے اپنی جانب سے خلع کی افواہوں کو محض افسانہ قرار دیا اور مزید کچھ کہنے سے گریز کیا۔