خشک کھانسی کا اچانک دورہ پڑجاتا ہے۔۔ خشک کھانسی کم کرنے میں مددگار 3 آزمودہ ٹوٹکے

ہوا میں خشکی اور ٹھنڈک کی وجہ سے بہت سے لوگوں کو خشک کھانسی کا مرض لاحق ہوگیا ہے۔ یہ ایک تکلیف دہ بیماری ہے جس میں متاثرہ شخص کو گھر ہو یا دفتر یہاں تک کہ سفر کے دوران بھی کھانسی کا شدید دورہ پڑسکتا ہے اور وہ کچھ نہیں کرسکتا۔

اس آرٹیکل میں آپ کو اس اذیت ناک کھانسی سے بچنے کے کچھ مفید اور آزمودہ ٹوٹکے بتائے جائیں گے جن سے آپ اس مرض کو کم کرسکتے ہیں۔ واضح رہے کہ ڈاکٹر سردیوں میں کھانسی کی سب سے بڑی وجہ خشک گلا، پانی کم پینا اور جراثیم کی افزائش بتاتے ہیں۔

بڑی الائچی اور چینی

3,4 بڑی الائچی کو توے پر اتنا بھونیں کہ اس کا چھلکا سیاہ پڑ جائے۔ اسے ہاتھ سے الگ کرلیں اور ڈیڑھ چمچ چینی میں بڑی الائچی کے دانے ملا کر رکھ دیں۔ صبح شام ایک ایک چٹکی اچھی طرح چبا کر کھا لیں۔ بڑی الائچی کی جگہ چھوٹی الائچی کا استعمال بھی کرسکتے ہیں۔ صرف چھوٹی الائچی چوس کر بھی کھانسی کی شدت پر قابو پایا جاسکتا ہے۔

گلے کے امراض میں مفید قہوہ

ایک طریقہ یہ بھی ہے کہ ڈیڑھ کپ پانی میں دو چھلے ہوئے لہسن کے جوئے اور ایک چھوٹا ٹکڑا ادرک، آدھا چائے کا چمچ ہلدی ڈال کر دھیمی آنچ پر اتنا پکائیں کہ پانی ایک کپ رہ جائے۔ اب اس میں ایک چمچ گرین ٹی کی پتی ڈال کر ایک منٹ تیز آنچ پر پکائیں۔ اب چھان کر لیموں کا عرق اور شہد ملا کر پی جائیں۔ دن میں 2 بار اس چائے کے استعمال سے سینے کی جکڑن اور خشک ہو یا بلغمی ہر طرح کی کھانسی میں آرام آجائے گا۔

گڑ کا قہوہ

ایک کپ پانی میں گڑ کے ٹکڑے ڈالیں اور ایک چمچ چائے کی پتی ڈال کر 2 منٹ پکائیں۔ یہ چائے بغیر دودھ کے پئیں۔ گڑ کی تاثیر گرم ہوتی ہے۔ یہ سینے کے افعال درست کرے گا۔