کسی کے لئے خود کو نہیں بدلوں گی.. فوٹوگرافرز سے بدتمیزی کرنے پر مشہور کاجول ایک بار پھر پھٹ پڑیں

"میں ان لوگوں میں سے نہیں ہوں جو ہر وقت صرف اپنا چمکتا ہوا پہلو دکھاتے ہیں، اور نہ ہی یہ توقع رکھیں کہ میں ہمیشہ ویسا ہی رہوں گی۔ میں دوسروں کے لیے خود کو تبدیل نہیں کروں گی، اور جیسی ہوں اس پر معذرت بھی نہیں کروں گی۔ ہر انسان کی زندگی میں اچھے اور برے دن ہوتے ہیں، اور میرے لیے بھی یہ سچ ہے۔ غصہ آتا ہے، میں ایک عام انسان ہوں، بس یہ بات یاد رکھیں۔ یہ ٹھیک ہے کہ میں ایک مشہور شخصیت ہوں، مجھے اپنے غصے کو کنٹرول میں رکھنا چاہیے، مگر سوشل میڈیا پر اکثر لوگ خود کو بے عیب بنا کر پیش کرتے ہیں۔ میرا معاملہ ایسا نہیں ہے اور مجھے نہیں لگتا کہ صرف دوسروں کے لیے خود کو بدلنے کی ضرورت ہے۔"

کاجول، جو اپنی بے ساختہ شخصیت اور جاندار اداکاری کے لیے مشہور ہیں، حالیہ انٹرویو میں اپنے فوٹوگرافروں کے ساتھ سخت رویے کے حوالے سے ہونے والی تنقید کا جواب دیتے ہوئے سامنے آئیں۔ اداکارہ نے کھل کر کہا کہ انہیں مصنوعی چہرہ دکھانے کا کوئی شوق نہیں اور نہ ہی وہ اپنی زندگی کے عام دنوں میں غصے یا تھکاوٹ کو چھپانے کی ضرورت محسوس کرتی ہیں۔

گزشتہ دنوں سوشل میڈیا پر متعدد ویڈیوز وائرل ہوئیں جن میں کاجول کو عوامی مقامات پر فوٹوگرافروں پر غصہ کرتے دیکھا گیا، جس کے بعد انہیں بدتمیز کے القابات کا سامنا کرنا پڑا۔ کاجول نے ان تبصروں کو نظرانداز کرتے ہوئے واضح کیا کہ وہ اپنی اصلیت کو چھپانے کے بجائے اپنے حقیقی جذبات کے ساتھ جینا پسند کرتی ہیں۔

انہوں نے مزید کہا کہ "مشہور شخصیت ہونے کا مطلب یہ نہیں کہ ہم اپنے تمام احساسات کو قابو میں رکھیں اور صرف دوسروں کی توقعات کے مطابق جئیں۔ سوشل میڈیا پر اکثر ہمیں ایسے لوگوں کے طور پر پیش کیا جاتا ہے جو ہر وقت کامل اور بے عیب ہیں، مگر میری حقیقت اس سے مختلف ہے۔" کاجول کے یہ بیان ان کے خوداعتمادی اور اپنی شخصیت کی سچائی کے اظہار کا غماز ہیں۔

اداکارہ کے مطابق، مشہور شخصیت ہونے کا یہ مطلب نہیں کہ انہیں ہر وقت سماجی توقعات پر پورا اترنا چاہیے۔ ان کے ان بیانات نے انٹرنیٹ پر ایک نئی بحث کو جنم دیا ہے، جہاں ایک طرف ان کے حامی ان کے جرات مندانہ اظہار کو سراہ رہے ہیں، تو دوسری طرف کچھ لوگ ان کے رویے پر سوال اٹھا رہے ہیں۔ واضح رہے کاجول فوٹوگرافرز سے سرد رویہ رکھنے پر جیا بچن جیسی شہرت رکھتی ہیں اور اکثر ہی ان کی پاپارازی سے بدتمیزی کے کلپس وائرل ہوتے رہتے ہیں۔