جنت مرزا کہاں شادی کریں گی اور دلہا کون ہوگا؟ ٹک ٹاکر نے شادی سے متعلق اہم انکشاف کر دیا

جنت مرزا نے حال ہی میں ایک پوڈکاسٹ میں شرکت کی، جہاں انہوں نے شادی سمیت ذاتی زندگی پر کھل کر بات کی۔

پروگرام کے دوران انہوں نے بتایا کہ، بہت چھوٹی عمر سے ہی انہوں نے سیر و سفر کرنا شروع کیا، پہلی بار وہ 6 سال کی عمر میں والدین کے ہمراہ یورپ گئی تھیں۔

جنت کے مطابق، ان کے والد پولیس افسر ہیں تو انہیں مختلف ٹریننگ سمیت دوسرے کاموں کی وجہ سے دنیا کے مختلف ممالک کی جانب سفر کرنا پڑتا تھا، اس لیے وہ اہل خانہ کے ہمراہ سفر کرتے تھے۔

شادی سے متعلق پوچھے گئے سوال پر جنت مرزا نے بتایا کہ ان کی خواہش ہے کہ وہ گلگت بلتستان کے سیاحتی مقام اسکردو میں شادی کریں۔

انہوں نے بتایا کہ، ان کی خواہش ہے کہ پہاڑوں کے درمیان کھلے آسمان تلے ان کی شادی کی تقریبات ہوں، جس میں انتہائی قریبی رشتے دار اور دوست شریک ہوں۔

ان کا کہنا تھا کہ یہ پلان ان کی بہن علیشبا مرزا کا تھا کہ وہ اسکردو میں شادی کریں لیکن اب انہوں نے بھی یہی سوچا ہے کہ وہ وہاں شادی کریں گی۔

جنت مرزا نے شادی سے متعلق مزید کوئی معلومات فراہم نہیں کی، تاہم بتایا کہ وہ جب بھی شادی کریں گی، اسکردو میں ہی تقریبات منعقد کریں گی۔

خیال رہے کہ 2022 میں جنت مرزا کی عمر بٹ نامی ٹک ٹاکر سے منگنی کی افواہیں بھی آئی تھیں اور بعد ازاں جنت مرزا نے منگنی ٹوٹنے کی تصدیق کی تھی۔