جامنی بند گوبھی کے 5 کرشماتی فوائد ۔۔ وزن بھی کرے کم اور جلد کی کرے حفاظت

بند گوبھی تو سب نے کھائی ہوگی، خاص کر سلاد میں اس کا استعمال بہت زیادہ کیا جاتا ہے۔ اس کے علاوہ اس کو سبزی کی شکل میں بھی کھایا جاتا ہے۔ یہ فاسٹ فوڈ میں بھی سلاد کے طور پر بہت ذوق و شوق سے کھائی جاتی ہے۔ بچے اور بڑے سب ہی اس کو پسند کرتے ہیں۔ یہ غذائیت سے بھرپور سبزی ہے ، اب پاکستان میں بھی یہ مختلف رنگوں میں کاشت کی جارہی ہے، پہلے یہاں اس کا ایک ہی سبز رنگ دستیاب تھا لیکن اب یہ جامنی رنگ میں بھی دستیاب ہے جامنی بند گوبھی کو سرخ بند گوبھی بھی کہا جاتا ہے۔ اس میں بے حد غذائیت پائی جاتی ہے۔ جبکہ کیلوریز کم ہوتی ہیں اس لئے ڈائٹ کے شوقین افراد اس کو زیادہ پسند کرتے ہیں۔اس میں اعلٰی معیار کے کاربوہائیڈ ریٹس، پوٹاشیم،کیلشئیم اور وٹامنز اور منرلز کا خزانہ چھپا ہے۔ اس میں ایک خاص اینٹی آکسیڈنٹ اینتھوسیانن موجود ہتا ہے جو کہ فری ریڈیکلز کا خاتمہ کرتا ہے اور کینسر سے بچاؤ میں مدد دیتا ہے۔

جامنی گوبھی کے کرشماتی فوائد:

1۔ ہاضمے میں مددگار:

اس میں بہترین فائبر پایا جاتا ہے جو کہ نظامِ ہضم کو بہتر بناتا ہے، یہ آنتوں کے افعال کو درست کرتا ہے اور قبض سے بچاتا ہے۔ اس میں غذائیت زیادہ اور کیلوریز کم ہوتی ہیں جو وزن کم کرنے میں مدد دیتی ہیں اور پیٹ زیادہ دیت ےک بھرے رہنے کا احساس دلاتی ہے۔

2۔ بلڈ پریشر کے مریضوں کے لئے مفید:

اس بند گوبھی میں کیونکہ پوٹاشیم کافی مقدار میں موجود ہوتا ہے اس لئے یہ بلڈ پریشر کے مریضوں کے لئے انتہائی مفید سبزی ہے۔ کولیسٹرول کم کرنے میں بھی مددگار ہے۔ اس لئے بلڈ پریشر اور دل کے مریض اس کا بے فکری سے استعمال کر سکتے ہیں۔

3۔ جِلد کی خوبصورتی کے لئے:

یہ اینٹی آکسیڈنٹس سے بھرپور ہوتی ہے۔ اسی لئے جلد کی خوبصورتی میں کارآمد ہے۔ اینٹی آکسیڈنٹس جھریاں بننے کے عمل کو سست کردیتے ہیں اور آپ کو دیر تک جوان و حسین رکھتے ہیں۔ اس کے علاوہ اس میں وٹامن سی کی بھی بھرپور مقدار موجود ہے جو کہ جلد کو جوان رکھنے کا ایک اہم ذریعہ ہے۔

4۔ مدافعتی نظام کو قوی بنائے:

اس بند گوبھی کا ایک کمال یہ ہے کہ اس میں سنگترے سے زیادہ وٹامن سی موجود ہوتا ہے اس کےعلاوہ وٹامن اے، اینٹی آکسیڈنٹ مل کر آپ کے مدافعتی نظام کو بوسٹ کر دیتے ہیں۔ یہ میٹا بولزم کو فعال بنا کر جسم سے فاسد مادوں کو نکال باہر کرتا ہے۔ بینائی بھی تیز ہوتی ہے۔

5۔ پٹھوں کی مضبوطی کے لئے مفید:

اس گوبھی کو بطور سلاد کھایا جائے تو اس سے زیادہ فائدے حاصل ہوسکتے ہیں۔ یہ پٹھوں کو مضبوط بنائے اوراس میں موجود پوٹاشیم، منرلز اور وٹامنز ہڈیوں اور پٹھوں کے درد کو بھی کم کرتے ہیں۔ اور ان کو زیادہ مضبوطی دیتے ہیں۔