عام سے پھول سونے سے بھی زیادہ قیمتی۔۔ ڈاکٹر ام راحیل نے گیندے کے پھول کے کون سے انوکھے فائدے بتادیے؟

“سردیوں میں گیندے کے پھولوں کی بہتات ہوتی ہے۔ لوگ ان کی اہمیت نہیں جانتے۔ اگر جان لیں تو یہ پھول سونے کے بھاؤ بکیں۔ گیندے کے پھول کے اتنے فائدے ہیں کہ یہ قیمتی سونے سے کم ہر گز نہیں“

یہ کہنا ہے مشہور ہربلسٹ ڈاکٹر ام راحیل کا جنھوں نے اپنے نئے وی لاگ میں گیندے کے پھول کا پاؤڈر بنانے اور اس کے فوائد بتائے ہیں۔ اس آرٹیکل میں اپنے قارئین کے لئے ہم وہ فائدے بتارہے ہیں۔

گیندے کا پاؤڈر

گیندے کے پھولوں کو توڑ کر دھو لیں اور چھاؤں والی جگہ پر پھیلا کر سکھا لیں۔ یہ ذہن میں رکھیں کہ دھوپ میں ہر گز نہیں سکھانا ورنہ سارے اجزاء ضائع ہوجائیں گے۔ سکھانے کے بعد گرائینڈ کر کے باریک پاؤڈر بنا کر کسی کنٹینر میں رکھ دیں۔ یہ سال بھر استعمال کے لئے کافی ہوگا۔

زخم سے خون نہ رکے تو

اگر ہاتھ کٹنے کے بعد زخم بن جائے اور خون نہ رک رہا ہوں تو گیندے کے پھولوں کی پتیاں زخم پر ملیں۔ خون رک جائے گا۔

جلنے پر لگائیں

اگر کسی کا ہاتھ یا جسم کا کوئی حصہ جھلس جائے تو ناریل کے تیل میں گیندے کے پھول کا پاؤڈر ملا کر لگائیں۔ اس سے چھالہ نہیں بنے گا نہ ہی نشان رہے گا اور اگر نشان آگیا ہے تو اسے لگانے سے چلا جائے گا۔

بستر پر لیٹنے والے مریضوں کے لئے

کچھ ایسے مریض ہوتے ہیں جن کو کسی لاچاری یا بیماری کی وجہ سے مستقل بستر پر لیٹنا پڑتا ہے اور ان کے جسم پر زخم بن جاتے ہیں۔ ان کے لئے ایک لیٹر پانی ابالیں اور اس میں گیندے کے پھول کی پتیاں توڑ کر ڈالیں۔ 2 سے 3 دن اس پانی کو ایسے ہی چھوڑ دیں اور پھر چھان کر کسی بوتل میں محفوظ کر لیں۔ اس پانی کو مریضوں کے زخم پر لگانے سے زخم ٹھیک ہوجاتے ہیں۔

الرجی

گیندے کے پھول کا پانی الرجی اور گرمی دانوں کی صورت میں بھی لگایا جاسکتا ہے اس کے علاوہ اس کا پاؤڈر چہرے کے ماسک کے طور پر بھی لگایا جاسکتا ہے۔