کیا آپ چیکو کے حیرت انگیز فوائد سے واقف ہیں؟ جانیئے یہ رسیلا پھل آپ کی صحت پر کیا اثر ڈالتا ہے؟

پھلوں کی دنیا میں ایک بےحد شیریں اور غذائیت سے بھرپور پھل چیکو بھی ہے، یہ پھل ہضم کرنے میں آسان جبکہ مجموعی صحت پر حیرت انگیز اثرات ڈالتا ہے، صرف یہی نہیں بلکہ چیکو صحت کے ساتھ ساتھ خوبصورتی میں اضافے یعنی بال، جلد اور ناخنوں کے لئے بھی مفید ہے۔

• چیکو کی غذائیت

ماہرینِ صحت کے مطابق چیکو فائبر، وٹامن اے، سی اور بی1 سے بھرپور ہوتا ہے، اس کے علاوہ چیکو میں آئرن، فاسفورس، کاپر، کیلشیم، سوڈیم، پوٹاشیم وغیرہ موجود ہوتے ہیں۔

چیکو کے حیرت انگیز فوائد

• نظامِ ہاضمہ کے لئے مفید

چیکو ایک جلد ہضم ہونے والا پھل ہے اس میں فائبر کی وافر مقدار اسے نظامِ ہاضمہ کے لئے بہترین بناتی ہے، چیکو نظام ہاضمہ کی کارکردگی درست کرنے والے انزائمز پیدا کرتا ہے جس سے بدہضمی کی شکایت دور ہوتی ہے.

• معدے کی صحت کے لئے مفید

ساتھ ہی چیکو معدے کی صحت کے لئے بھی مفید ہے، یہ معدے کی تیزابیت کم کرتا ہے اور ٹھنڈک کا احساس دلاتا ہے، چیکو میں پائے جانے والے اینٹی آکسیڈینٹ بیماریوں کے خلاف جسم میں لڑنے کی صلاحیت پیدا کرتے ہیں۔

• بینائی کے لئے مفید

چیکو میں وٹامن اے کی وافر مقدار موجود ہوتی ہے یہی وجہ ہے کہ چیکو آنکھوں کی صحت اور بینائی کے لئے بھی مفید ہے۔

• ہڈیوں کے لئے مفید

چیکو میں کیلشیم اور وٹامن ڈی بھی موجود ہوتا ہے، اس لیے چیکو کھانے سے ہڈیاں بھی مضبوط ہوتی ہیں، اس میں موجود وٹامن ڈی توانائی فراہم کرتا ہے اور ہڈیوں کو مضبوط بناتا ہے۔

• حاملہ خواتین کے لئے مفید

چیکو کی ایک سب سے اہم بات یہ ہے کہ چیکو کا استعمال حاملہ خواتین کے لیے بھی بے حد مفید ہے، چیکو میں کاربوہائیڈریٹس موجود ہوتے ہیں جو حاملہ خواتین کو طاقت اور مطلوبہ غذائیت فراہم کرتے ہیں، چیکو کا فرحت بخش ذائقہ اور خوشبو متلی اور کمزوری کی کیفیت کو دور کرتے ہیں، اس میں فائبر بھی پایا جاتا ہے جو جسم کو موسمی انفیکشن اور نقصان دہ جراثیم سے تحفظ فراہم کرتا ہے۔

• احتیاطی تدابیر

چیکو سے بہترین فوائد تب ہی حاصل ہوسکتے ہیں جب اسے پکا ہوا کھایا جائے- کچا پھل کھانا انتہائی نقصان دہ ثابت ہوسکتا ہے- کچا چیکو کھانے سے منہ کا السر٬ گلے میں کجھلی کا احساس اور سانس لینے میں دشواری کا سامنا ہوسکتا ہے۔