خود شادی نہ کی مگر والد کی دوسری کروا دی۔۔ سینئر اداکار اسد ملک کی زندگی کا سب سے بڑا دکھ کیا ہے؟ بتاتے ہوئے جذباتی

Actor Asad Malik Talks About His Parents And Marriage

پاکستانی ڈرامہ انڈسٹری کے سینئر اداکار اسد ملک نے اپنی نجی زندگی کے ایسے پہلوؤں سے پردہ اٹھایا جنہیں سن کر مداح بھی حیران اور جذباتی ہوگئے۔

ایک ٹی وی پروگرام میں گفتگو کرتے ہوئے انہوں نے بے جھجک بتایا کہ انہیں شادی میں کبھی دلچسپی نہیں رہی۔ ان کا ماننا ہے کہ انسان بغیر شادی کے بھی بھرپور زندگی گزار سکتا ہے۔ بچے بے شک انہیں بے حد پسند ہیں، لیکن صرف اولاد کے لیے وہ یہ رشتہ نبھانے پر آمادہ نہیں کیونکہ شادی کے ساتھ قربانیاں اور ذمہ داریاں جڑی ہیں جنہیں وہ قبول کرنے کے لیے تیار نہیں۔

اداکار نے اپنے والدین کا ذکر کرتے ہوئے کہا کہ والدہ کے انتقال نے ان کی زندگی میں ایک بڑا خلا چھوڑ دیا۔ صرف بیس برس کی عمر میں ماں کا سایہ سر سے اٹھ گیا، اس لیے یادیں بھی دھندلی سی رہ گئیں۔ وہ سخت گیر مزاج رکھتی تھیں، مگر والد نے ماں کے جانے کے بعد باپ اور ماں دونوں کا کردار نبھایا۔ دفتر سے دوپہر کو واپس آکر کھانا پکانا، بچوں کو اپنے سامنے کھلانا اور پھر دوبارہ کام پر لوٹ جانا—یہ سب ان کے والد کے معمولات تھے۔

اسد ملک نے مزید بتایا کہ والد نے کئی سال تنہا وقت گزارا، لیکن ہمیشہ بیٹے کی خواہشات پوری کیں۔ اسی محبت اور اعتماد کے باعث انہوں نے اپنے والد کی دوسری شادی خود کروائی تاکہ وہ زندگی تنہائی میں نہ گزاریں۔ تاہم ایک دکھ ہمیشہ دل میں رہا کہ جب والد اس دنیا سے رخصت ہوئے تو وہ ان کے پاس موجود نہ تھے۔

انتہائی جذباتی انداز میں انہوں نے کہا، اگر مجھے دوبارہ ایک لمحے کے لیے والد کو گلے لگانے کا موقع مل جائے تو میں اپنی جان بھی قربان کر دوں

اس مکالمے نے مداحوں کو سوچنے پر مجبور کر دیا کہ شہرت اور کامیابی کے باوجود والدین کا رشتہ زندگی کا سب سے بڑا سہارا ہوتا ہے۔