خوشی دیکھنا نصیب نہ ہوئی۔۔ 75 سالہ بوڑھے کی شادی کے اگلے دن موت کیسے ہوئی؟ سارا گاؤں سوگوار

75 Year Old Groom Dies Next Day Of The Wedding

بھارت کی ریاست اتر پردیش میں ایک ایسا واقعہ سامنے آیا ہے جس نے گاؤں کے لوگوں کو حیران اور شکوک میں مبتلا کر دیا ہے۔ ضلع جونپور کے کچھمچھ گاؤں میں 75 سالہ کسان سنگرو رام نے 35 سالہ منبھاوتی سے شادی کی، مگر شادی کے اگلے ہی دن اچانک ان کا انتقال ہو گیا۔

سنگرو رام کی پہلی اہلیہ ایک سال قبل وفات پا چکی تھیں۔ طویل تنہائی کے بعد انہوں نے دوسری شادی کا فیصلہ کیا۔ گاؤں والوں نے ان کی عمر کے باعث اس فیصلے کی مخالفت کی لیکن وہ اپنے ارادے پر قائم رہے۔ کاغذی کارروائی مکمل کرنے کے بعد انہوں نے مقامی مندر میں سادگی کے ساتھ شادی کی۔

منبھاوتی کی بھی یہ دوسری شادی تھی۔ اس کے پہلے شوہر سے دو بیٹیاں اور ایک بیٹا ہے۔ شادی سے قبل سنگرو رام نے وعدہ کیا تھا کہ وہ نہ صرف بیوی کا خیال رکھیں گے بلکہ بچوں کی پرورش کی ذمہ داری بھی قبول کریں گے۔

تاہم، اگلی ہی صبح اچانک ان کی طبیعت خراب ہوئی۔ گھر والوں نے فوراً قریبی اسپتال پہنچایا، مگر ڈاکٹروں نے بتایا کہ وہ راستے میں ہی دم توڑ چکے ہیں۔

اس اچانک موت نے سنگرو رام کے اہل خانہ کو مشتبہ بنا دیا۔ انہوں نے پولیس کو اطلاع دی اور شک ظاہر کیا کہ اس واقعے کے پیچھے کوئی سازش یا مجرمانہ پہلو بھی ہو سکتا ہے۔ پولیس نے لاش کو پوسٹ مارٹم کے لیے بھجوا دیا ہے اور تحقیقات شروع کر دی ہیں تاکہ یہ طے کیا جا سکے کہ یہ موت قدرتی تھی یا اس کے پیچھے کوئی اور حقیقت چھپی ہے۔