والد اب کسی کو پہچان نہیں پاتے ۔۔ سینئر اداکار طلعت حسین کی صحت کے بارے میں ان کی بیٹی نے کیا بتایا؟ دیکھئے

پاکستان شوبز انڈسٹری کے سینئر اداکار طلعت حسین کی چند ماہ قبل طبعیت کافی ناساز تھی جس کے بعد آہستہ آہستہ ان کی صحت میں بہتری آئی۔

اداکار کے حوالے سے بتایا گیا تھا کہ وہ ڈیمنشیا کا شکار ہیں یعنی انہیں بھولنے کی بیماری ہے۔

اب طلعت حسین کی صحت کے حوالے سے ان کی بیٹی تزین حسین نے آگاہ کیا ہے۔

تزین حسین نے حال ہی میں ایک نجی ٹی وی کے پروگرام میں بطور مہمان خصوصی شرکت کی جہاں اُنہوں نے اپنے والد طلعت حسین کے بارے میں بات کی۔

اُنہوں نے بتایا کہ والد ہمیشہ سے ہی بہت نرم مزاج انسان رہے ہیں، اس لیے جب بھی مجھے اور میرے بہن بھائیوں کو والدہ کی ڈانٹ سے ڈر لگتا تھا تو ہم اپنے والد کے پاس جاتے تھے۔

اداکارہ نے بتایا کہ والد بہت مہذب انسان ہیں اور اُنہوں نے ہم بچوں میں اپنی یہ تمام خصوصیات منتقل کی ہیں۔

اُنہوں نے والد کی صحت کے بارے میں بات کرتے ہوئے کہا کہ وہ ڈیمنشیا کا شکار ہیں اور کچھ عرصے پہلے انہیں سینے میں انفیکشن ہو گیا تھا جس کی وجہ سے ان کی طبیعت کافی خراب ہوگئی تھی اور انہیں اسپتال میں داخل کروایا گیا۔

تزین حسین نے بتایا کہ اس وقت ہم نے سب لوگوں سے ان کے لیے دعاؤں کی اپیل کی اور مداحوں کی دعاؤں سے وہ خود چل کر اسپتال سے گھر واپس آئے اور اب وہ ٹھیک ہیں مگر کبھی کبھی ان کی طبیعت تھوڑی ناساز رہتی ہے۔

اُنہوں نے بتایا کہ ڈیمنشیا کی وجہ سے والد کی یادداشت متاثر ہو رہی ہے اور کبھی کبھی وہ لوگوں کو نہیں پہچان پاتے۔