طارق عزیز اپنی آنکھیں عطیہ کرنا چاہتے تھے مگر۔۔ بے اولاد ہونے کے باوجود بچہ گود کیوں نہیں لیا؟ طارق عزیز کی بیوہ شوہر کو یاد کر کے رو پڑیں

“طارق عزیز صاحب مجھ سے بہت محبت کرتے تھے اور میں ان سے بے حد محبت کرتی ہوں۔ ان کے دونوں ہاتھ پینٹ کی جیب میں ہوتے تھے اور وہ ہر مانگنے والے کو کچھ دے دیتے تھے لیکن آج تک پتہ نہیں چلا کہ وہ کس کو کیا دیتے تھے۔ مجھے لگتا تھا ان کے انتقال کے بعد لوگ انھیں بھول جائیں گے مگر لوگوں کی ان کے لئے محبت بڑھتی جارہی ہے“

یہ کہنا ہے مرحوم لیجنڈ طارق عزیز کی اہلیہ حاجرہ طارق عزیز کا جو ڈاکٹر ہیں۔ ڈاکٹر حاجرہ نے گزشتہ ماہ مرحوم شوہر کی تیسری برسی کے موقع پر ایک نجی چینل کو انٹرویو دیا۔

ڈاکٹر حاجرہ نے بتایا کہ طارق عزیز اپنی آنکھیں عطیہ کرنا چاہتے تھے لیکن یہ بات ان کے انتقال کے بہت بعد میں پتہ چلی۔ وہ مختلف نوٹس لکھ کر کتابوں میں رکھتے تھے اور ان کے انتقال کے بعد جب ایک دن کتاب میں چٹ دیکھی تو اس بات کا علم ہوا۔ تاہم وقت گزر چکا تھا۔

ڈاکٹر حاجرہ جو ایک گائناکولوجسٹ ڈاکٹر ہیں ان کا کہنا ہے کہ وہ خود بے سہارا بچے بے اولاد جوڑوں کو دیتی تھیں لیکن انھوں نے کبھی بچہ گود نہیں لیا کیونکہ طارق عزیز کو لگتا تھا تھا کہ بچہ یا بچی جوان ہونے پر گود لینے والے ماں باپ سے پردے کے پابند ہیں اس لئے انھوں نے گود لینا مناسب نہیں سمجھا۔ البتہ اپنی ساری دولت حکومت پاکستان اور لائبریری ایک کالج کو عطیہ کردی ہے۔