اسٹریس اور نیند نہ آنے کے مسائل میں بابونہ کے پھول کی چائے سکون پہنچائے

کہتے ہیں کہ گرما گرم چائے کا ایک کپ سخت سردی میں کسی نعمت سے کم نہیں اور ساتھ ہی درد کی صورت میں گلے میں آرام بھی پہنچاتا ہے۔ مگر کچھ چائے ایسی بھی ہیں جن سے کئی طرح کے فائدے حاصل کیے جاسکتے ہیں۔ ان ہی میں کیمومیل یعنی بابونہ کا پھول ہے جس سے بنی چائے کے خواص لاتعداد ہیں۔
اس پھلول کی پتیوں سے بنی چائے کو یہ کمال حاصل ہے کہ اسے صرف چائے کے طور پر ہی نہیں لیا جاتا بلکہ صدیوں سے کئی طرح کے امراض میں دوا کے طور پر بھی استعمال کیا جاتا ہے۔ یہ دنیا کی بہترین چائے جسے زیادہ تر ذہنی سکون اور معدے کے امراض کے لیے استعمال کیا جاتا ہے۔
اس پھول کی سب سے خاص بات یہ ہے اسے آپ گھر کے لان، گارڈن میں آسانی کے ساتھ اگا سکتے ہیں۔ اور اس کی چائے بنانا نہ صرف بہت آسان ہے بلکہ ساتھ ہی اسے دوسری ہرب کے ساتھ ملاکر اس کی افادیت کو مزید بڑھایا بھی جا سکتا ہے۔
اس میں ایسے اجزا پائے جاتے ہیں جواسٹریس کو دور کرکے ذہن کو پرسکون رکھنے والے سیروٹونین اور میلاٹونین نامی ہارمونز کا اخراج بڑھاتے ہیں۔ یہ ہر طرح کی سوزش کو بھی دور کرتی ہے جس کے نتیجے میں پریشانی اور سردرد سے بھی نجات ملتی ہے۔ نظام انہضام کو بہتر کرتی ہے۔ گیس میں افاقہ دلاتی ہے۔ اپنے صحت بخش اجزائ کی بدولت امنیاتی نظام کو مضبوط بناکر کئی طرح کے امراض سے محفوظ رکھتی ہے۔ اس کی تازہ اور خشک دونوں پتیوں سے چائے تیار کی جاتی ہے۔

تازہ پتیوں سے بنی چائے

مٹھی بھرتازہ پتیاں ایک کپ پانی میں ڈال کر 5 منٹ تک ابال کرچھان لیں۔ ذائقہ کے لیے چینی اور شہد کو ڈال کر نوش فرمائیں۔
دار چینی کے ساتھ
پانی 1کپ
دودھ 1 کپ
کیمومیل کی تازہ پتیاں مٹھی بھر
پسی دار چینی ½ چائے کا چمچ

ترکیب: ایک پین میں پانی گرم کریں، ابال آنے پراسے ہیٹ سے ہٹا کرتازہ پتیاں ڈال دیں، 5 منٹ کے بعد چھان کر پسی دار چینی شامل کریں۔ جبکہ دو سرے پین میں دودھ گرم کریں یہاں تک ابال آنے لگے پھر اسے چمچ سے ہلاتے جائیں کہ وہ کچھ گاڑھا ہو جائے۔ اس کے بعد ایک کپ میں چائے اور دودھ ملاکر اوپر سے دارچینی ڈال کر گرم گرم پیش کریں۔

ادرک کے ساتھ
پانی 1 کپ
تازہ ادرک ½ انچ
بابونہ کی تازہ پتیاں 2 کپ
شہد 4 کھانے کے چمچے
لیموں کا رس 2 چائے کے چمچے
برف حسب ضرورت

ترکیب: ایک پین میں پانی گرم کریں، ابال آنے پرہیٹ سے ہٹادیں ایک منٹ کے بعد اس میں ادرک، پتیاں، شہد اور لیموں کا رس شامل کرکے ایک گھنٹے کے لیے ٹھنڈا ہونے کے لیے رکھ دیں۔ اسے ایک بڑے گلاس میں نکال کر 3 گھنٹے کے لیے ریفریجریٹر میں رکھ دیں۔ آئس کیوب اور لیموں کے سلائس ڈال کر سرو کریں۔