نواب خاندان میں پاکستانی برانڈ کے جوڑے کی دھوم۔۔ کیا آپ شرمیلا ٹیگور کے اس پاکستانی جوڑے کی قیمت جانتے ہیں؟

8 دسمبر کو بالی وڈ کی عظیم اداکارہ شرمیلا ٹیگور نے اپنی سالگرہ خاندان اور قریبی عزیزوں کے ساتھ منائی۔ اس خاص دن پر، نہ صرف ان کے باوقار انداز نے دل جیتا، بلکہ ان کی پہنی ہوئی انارکلی نے سب کی توجہ اپنی جانب کھینچ لی۔ حیرت انگیز طور پر، یہ جوڑا ایک پاکستانی برانڈ "ویئر منٹو" کا تخلیق کردہ تھا، جس نے نہ صرف ان کے حسن کو چار چاند لگا دیے بلکہ پاکستانیوں کے دل بھی جیت لیے۔

شرمیلا ٹیگور نے اپنی سالگرہ کے موقع پر "حیات انارکلی" کے نام سے کریم رنگ کی فراک کا انتخاب کیا۔ آستینوں اور گھیرے پر دلکش پرنٹڈ پٹی، دوپٹے پر نارنجی اور گلابی پھول، اور کناروں پر موجود اردو خطاطی نے اس لباس کو خاص اور منفرد بنا دیا۔ انہوں نے اس فراک کو سرخ موتیوں کی مالا سے مزین کیا، جس سے ان کی شخصیت مزید نکھر کر سامنے آئی۔

دلچسپ بات یہ ہے کہ "ویئر منٹو" کوئی بڑا یا مشہور برانڈ نہیں، بلکہ یہ کراچی میں حال ہی میں لانچ ہوا ہے۔ خطاطی سے مزین منفرد ڈیزائنوں کی بدولت یہ برانڈ ایک خاص مقام حاصل کر چکا ہے، لیکن اس کا جوڑا ایک بالی وڈ لیجنڈ تک کیسے پہنچا؟ برانڈ مالکان خود بھی اس راز سے لاعلم ہیں اور ان کا خیال ہے کہ شاید یہ لباس کسی نے اداکارہ کو تحفے میں دیا ہو۔

شرمیلا کا یہ جوڑا پاکستانی روپے میں 9,500 اور بھارتی کرنسی میں صرف 2,900 روپے کا ہے۔ یہ بات ظاہر کرتی ہے کہ وہ چمک دمک سے زیادہ نفاست اور اپنی شخصیت کے مطابق لباس کا انتخاب کرتی ہیں۔

شرمیلا کے اس انتخاب نے نہ صرف سوشل میڈیا صارفین بلکہ خود برانڈ مالکان کو بھی حیران کر دیا۔ مداحوں نے ان کی نفاست کی تعریف کی، جبکہ برانڈ کے انسٹاگرام کمنٹ سیکشن میں خوشی کی لہر دوڑ گئی۔