جتنی لمبی شادی اتنا چھوٹا رشتہ۔۔ سحر حیات نے سمیع رشید سے طلاق کی تصدیق کرتے ہوئے کیا کچھ بتایا؟

Sehar Hayat Announces Divorce With Sami Rasheed

سحر حیات ایک بار پھر سوشل میڈیا کی شہ سرخیوں میں ہیں۔ 2023 میں انہوں نے گلوکار سمیع رشید کے ساتھ نہایت شاندار اور پُرتکلف شادی کی تھی جس میں نامور انفلوئنسرز اور مشہور شخصیات شریک ہوئیں۔ 2024 میں ان کے ہاں بیٹی آئرہ کی پیدائش ہوئی تو مداحوں نے اس جوڑی کو ایک خوشحال خاندان کے طور پر دیکھا، مگر جلد ہی ان کے درمیان فاصلے بڑھنے لگے اور اختلافات کھل کر سامنے آنے لگے۔ ابتدا میں لوگوں کو لگا یہ محض ایک تشہیری ہتھکنڈہ ہے، لیکن وقت کے ساتھ ساتھ معاملہ سنگین ہوتا گیا۔

حالیہ دنوں سحر حیات نے ایک جذباتی انسٹاگرام پوسٹ کے ذریعے باضابطہ طور پر طلاق کی تصدیق کردی۔ انہوں نے اپنے سوال و جواب کے سیشن میں صاف الفاظ میں کہا، ہمارے راستے اب الگ ہیں لیکن سمیع ہمیشہ آئرہ کے والد رہیں گے۔ اس بات میں رتی بھر شک نہیں کہ بیٹی کو باپ کے نام سے ہی پہچانا جائے گا۔ میں اپنی بیٹی کو سکھاؤں گی کہ ماں اور باپ دونوں کی عزت کرے۔ جہاں تک ملاقات کی بات ہے، میں نے کبھی کسی کو روکا نہیں اور نہ ہی روک سکتی ہوں۔ جو بھی فیصلہ ہوگا وہ قانون کے مطابق ہوگا، نہ کہ میری مرضی سے۔

یہ خبر سامنے آتے ہی سوشل میڈیا پر بحث چھڑ گئی۔ صارفین نے تبصرہ کیا کہ انفلوئنسرز کی شادیاں، شادی کی تقریبات سے بھی کم چلتی ہیں۔ کچھ نے کہا کہ ناتجربہ کاری میں رشتے برباد کر دیے جاتے ہیں اور سب سے زیادہ نقصان معصوم بچوں کو اٹھانا پڑتا ہے۔ کئی لوگ سحر حیات کو اس علیحدگی کا ذمے دار ٹھہرا رہے ہیں، جبکہ کچھ نے اس مشکل وقت میں ان کے لیے ہمدردی اور افسوس کا اظہار کیا۔

یہ واقعہ ایک بار پھر یہ سوال چھوڑ گیا ہے کہ روشنیوں اور شہرت کے پیچھے بھاگنے والی اس نئی نسل کو رشتوں کی سنجیدگی سمجھنے میں کتنا وقت لگے گا۔