کہیں بھی جائیں سر کی کھجلی آپ کو شرمندہ کروا دیتی ہے، کیا سر کی کھجلی خطرناک بھی ثابت ہو سکتی ہے؟وجوہات وعلامات؟

اکثر تقریبات میں آپ نے دیکھا ہوگا کہ کچھ خواتین یا بچے بہت اچھے ٹپ ٹاپ سے تیار ہوتے ہیں،لیکن کچھ دیر ان کے ساتھ بیٹھیں تو پتہ چلتا ہے کہ ہر تھوڑی دیر بعد ان کا ہاتھ سر میں جاتا ہے ، سر کھجاتا دیکھ کر یقیناً آپ کو الجھن ہوتی ہے کہ کیا ان کے سر میں جوئیں ہیں اور کہیں یہ جوئیں آپ کے سر میں نہ چڑھ جائیں۔ یا پھر ان کے سر میں خشکی ہے جو ان کو باربار سر کھجانے پر مجبور کررہی ہے۔وجہ کچھ بھی ہو یہ عادت کسی کو بھی شرمندہ کروا سکتی ہے۔ سر کی کھجلی کی کیا وجوہات ہیں؟ اور ان کا کس طرح علاج کیا جا سکتا ہے ،یہاں ہم آپ کو اس کے کچھ آسان حل بتانے کی کوشش کریں گے ۔

سیب کا سرکہ :۔

یہ انتہائی فائدہ مند ہے،سیب کا سرکہ ایک بہت مفید غذا یا دوا کہہ لیں کیونکہ یہ کئی امراض میں کام آتا ہے۔یہ اینٹی بیکٹیریل،اینٹی انفلیمنٹری،اینٹی فنگل ہے۔اگر آپ کے سر میں خشکی ہے، اس وجہ سے آپ کے سر میں خارش یا کھجلی ہے تو اس کے لئے سیب کا سرکہ استعمال کریں۔

طریقہ استعمال:

اس کو ایک اسپرے بوتل میں پانی کے ساتھ ڈالیں،1۔1 کا ریشو رکھیں،ہفتے میں کئی دفعہ اس کا اپنے سر پر اسپرے کریں، اگر جلد کی خشکی کی وجہ سے ہوگی تو اس سے ختم ہوجائے گی ،اس کے علاوہ اس کو نیم گرم پانی میں ملا کر شیمپو کرنے کے بعد اس سے سر دھوئیں۔

لیمن جوس:۔

یہ بھی اینٹی بیکٹیریل ہے ۔ایک پیالے میں لیموں کا رس نکالیں اور اس کو کاٹن بال کی مددسے اپنے سر کی جلد پر لگائیں،دس منٹ ایسے ہی چھوڑ دیں پھر دھولیں۔ لیمن جوس کا استعمال بہت زیادہ نہ کریں کیونکہ اس کے زیادہ استعمال سے آپ کے بالوں کا کلر خراب ہوجائے گا ۔

مراقبہ:۔

بعض اوقات ذہنی دباؤ یا ٹینشن میں بھی لوگ سر کھجانا شروع کر دیتے ہیں۔ اس لئے اس بات میں کوئی حیرت نہیں ہونی چاہیے کہ جن چیزوں سے ذہنی دباؤ کم ہوتا ہو طریقے اختیار کیے جائیں تو اس سے بھی فرق پڑ سکتا ہے۔ کچھ لوگوں کی کھجلی اینزائٹی سے بڑھتی ہے مراقبہ ان صورتوں میں کارآمد ثابت ہو سکتا ہے جن کا سبب اینزائٹی ہے۔ مراقبے سے اپ اعصابی کنٹرول سیکھتے ہیں،اور اعصاب کنٹرول ہوں تو بہت سے مسائل ھل ہوجاتے ہیں ۔

آرگینک کوکونٹ آئل:۔

آرگینک کوکونٹ آئل میں لورک ایسڈ موجود ہوتا ہے۔اس میں اینٹی مائیکروبیل پراپرٹیزشامل ہیں۔ لورک ایسڈ ہماری جلد میں تیل کو جذب کرنے کی صلاحیت بڑھا دیتا ہے،ہمارے سر کو سکون پہنچاتا ہے۔جوؤں اور لیکھوں میں بھی فائدہ پہنچاتا ہے۔

پیپرمنٹ آئل:۔

پیپر منٹ آئل بھی سر کی کھجلی میں سکون پہنچاتا ہے۔ سر کی خشکی کم کرتا ہے۔ پیپر منٹ آئل کوکسی دوسرے تیل میں ملا کر استعمال کیا جاتا ہے۔ جیسے تھوڑا سا پیپر منٹ آئل اور تھوڑا سا زیتون کا تیل یا ناریل کا تیل یا سرسوں کا تیل لے کر اس میں اس کو ملائیں پھر سر کا مساج کریں۔ پھر دو گھنٹے بعد شیمپو کریں۔
بعض اوقات ایسینشل آئل یا شیمپو کے اجزاء بھی مسئلے کو خراب کرنے میں اہم کردار ادا کرتے ہیں ، یہ کچھ طریقے ہم نے یہاں پیش کئے اگر ان سے فائدہ نہ ہو تو اپنے ڈاکٹر سے رجوع کریں کیونکہ بعض اوقات اس خارش یا کھجلی کی سنگین یا سنجیدہ وجوہات بھی ہو سکتی ہیں جس کے لئے میڈیکل ٹریٹمنٹ ضروری ہے۔ علامات اگر کم نہ ہوں تو فوراً اپنے ڈاکٹر کو دکھائیں۔