صاف شفاف اور چمکدار جلد کے لئے کیری(کچا آم) کو چہرے پر لگائیں ،اوراس کا کمال دیکھیں

آم کا موسم ہو اور ہر گھر میں اس کی خوشبو نہ ہو ایسا ممکن نہیں ، آم کھانا ہر ایک کو پسند ہوتا ہے بچے اور بڑے سب ہی اس سے لطف اٹھاتے ہیں، آم کے ذائقے سے لطف اندوز ہونے کے علاوہ اس سے ہم جلد کے بھی کئی مسائل حل کر سکتے ہیں۔ آم میں غذائیت بھرپور ہے اس کی تاثیر گرم ہے جبکہ کیری یا کچے آم کی تاثیر ٹھنڈی ہے۔ اس سے جلد کے فوائد کیسے حاصل کر سکتے ہیں آئیے جانتے ہیں۔

جلد کے اوپر کیری کے اثرات:

کیری کے استعمال سے آپ جلد سے متعلق کئی مسائل سے جان چھڑوا کر شفاف اور صحت مند جلد حاصل کر سکتے ہیں۔ کچے آم کے ذائقے اور فوائد کی اپنی فہرست ہے۔ کچے آم کو اچار بنانے اور بہت سی سبزیاں بنانے کے لیے استعمال کیا جاتا ہے۔ اسے بازار میں کیری بھی کہا جاتا ہے۔ وٹامن سی اور دیگر بہت سے ضروری غذائی اجزاء سے بھرپور یہ پھل آپ کی جسمانی صحت کے ساتھ ساتھ آپ کی جلد کے لیے بھی کئی طریقوں سے فائدہ مند ثابت ہو سکتا ہے۔ گرمیوں کے موسم میں جلد سے متعلق مسائل سے چھٹکارا پانے کے لیے یہ ایک علاج ثابت ہو سکتا ہے۔ آپ کو بس اسے جلد پر صحیح طریقے سے استعمال کرنا ہے۔ اس آرٹیکل میں، ہم آپ کو جلد کے لیے کچے آم کے فوائد اور اس کے استعمال کے بارے میں تفصیل سے بتا رہے ہیں۔

جلد کے لئے مفید:

گرمیوں کے موسم میں ہم میں سے اکثر کو جلد سے متعلق بہت سے مسائل کا سامنا کرنا پڑتا ہے. جیسے جھریاں،جھائیاں، فائن لائنز، کیل مہاسے، ٹیننگ، آئلی جلد وغیرہ ۔ اس کے علاوہ جلد میں خشکی اور جلد کی چمک ختم ہونے جیسے مسائل ہوتے ہیں۔ کچا آم آپ کو جلد کے ان تمام مسائل سے نجات دلا نے میں مدد کرسکتا ہے۔ کیونکہ کچے آم میں بہت سے ایسے ضروری غذائی اجزاء موجود ہوتے ہیں جو جلد کے ان مسائل سے لڑنے میں مدد دیتے ہیں۔ کچے آم میں اینٹی آکسیڈنٹس موجود ہوتے ہیں۔ اس کے علاوہ اس میں وٹامن اے اور سی بھی اچھی مقدار میں موجود ہوتے ہیں جو آپ کو جلد کی بہترین نشونما کے لئے ضروری ہیں۔ یہ بڑھاپے کی علامات کو کم کرنے میں بھی مددگار ہے۔ جلد کے داغ دھبے دور ہوتے ہیں، آپ کو صاف اور چمکدار جلد ملتی ہے۔

جلد پر کچے آم کا استعمال:

صاف اور چمکدار جلد حاصل کرنے کے لیے آپ آم کا فیس پیک یا ماسک بنا کر گرمیوں میں جلد پر لگا سکتے ہیں۔ یہاں ہم آپ کے ساتھ کچے آم کے فیس پیک کی کچھ تراکیب شیئر کر رہے ہیں۔

1۔ کیری اور دلیے کا فیس ماسک

کیری 1 عدد
دلیہ 2 سے 3 چمچ
بادام 6 سے 7
کچا دودھ 2 سے 3 چمچ
کیری اور دلیہ کا فیس ماسک بنانے کے لیے آپ کو بس کیری، دلیہ اور بادام کو پیسنا ہے۔
اب انہیں کسی برتن میں ڈال کراس میں دودھ اچھی طرح مکس کریں۔ آپ کا فیس ماسک تیار ہے۔
آپ اس کو اپنے چہرے کی جلد اور جسم کے دیگر حصوں پر بھی لگا سکتے ہیں۔ اسے 15 منٹ تک جلد پر لگا رہنے دیں اس کے بعد سادہ پانی سے دھو لیں۔
آپ اس پیک کو ہفتے میں 2 سے 3 بار استعمال کر سکتے ہیں۔

2۔ کیری اور بیسن کا ماسک

کیری 3 سے 4 عدد
بیسن 2 سے 3 چمچ
شہد 1 چائے کا چمچ
دہی 1 چمچ
ہلدی پاؤڈر 1 چمچ
کیری اور بیسن کا فیس پیک بنانے کے لیے آپ کو کیری کو پیس کر پیسٹ بنانا ہوگا۔ ایک پیالے میں بیسن، شہد، دہی اور ہلدی ڈال کر اچھی طرح مکس کریں۔ اسے اپنے چہرے، گردن اور جسم کے دیگر حصوں پر لگائیں۔ جب یہ فیس پیک مکمل طور پر خشک ہوجائے تو اسے ٹھنڈے پانی سے دھولیں۔ اس پیک کو آپ ہفتے میں ایک بار لگا سکتے ہیں۔
کیری سے بنائے گئے ان فیس پیک کو جلد پر لگانے سے آپ کو جلد کے مردہ خلیوں سے نجات ملے گی، جلد کا رنگ بہتر ہوگا اور آپ کو نرم اور چمکدار جلد ملے گی۔ اس کے ساتھ یہ ٹیننگ، سن برن، پمپلز کو صاف کرنے میں مدد دے گا اور جلد ہائیڈریٹ رہے گی۔