3 مہینے کی نابینا بچی کو گود لیا اور پھر.. نادیہ جمیل کی گود لی بیٹی کی بینائی کیسے واپس آئی؟

"نوری میرے لیے معجزہ ہے وہ جب تین ماہ کی نابینا تھی جب میں نے اسے گود لیا تھا، اس کی جب بینائی واپس آئی تو یقین نہیں آیا. نوری اس وقت تین ماہ کی نابینا بچی تھی، جب میں نے اسے پہلی بار دیکھا. یہ خیال آیا تھا کہ بچی کسی غلط جوڑے کے پاس چلی گئی تو وہ اسے بیچارہ بنا دیں گے اور اس کا اعتماد ختم کردیں گے. میں نے اپنے شوہر سے اسے گود لینے کے لیے بات کی اور وہ فوراً تیار ہوگئے اس طرح ہماری بیٹی کی خواہش پوری ہوگئی"

یہ کہنا ہے نادیہ جمیل کا جو ماضی کی مقبول اداکارہ ہونے کے علاوہ کینسر سروائیور ہیں اور کئی بچوں کو گود لے کر ماں کی طرح ان کی پرورش بھی کرتی ہیں. نادیہ جمیل کا کہنا تھا کہ انھوں نے 30 سال پہلے م یتیموں کے ساتھ کام کرنے کا فیصلہ کیا تھا. انھوں نے یتیموں کے ساتھ کسی لالچ کی خاطر کام نہیں کیا، بہت سارے والدین اولاد نہ ہونے کی وجہ سے یتیم خانوں میں موجود ہوتے ہیں، وہ اولاد کے لیے تڑپ رہے ہوتے ہیں۔

نادیہ جمیل نے نوری کے متعلق کہا کہ گود لینے کے بعد ڈاکٹرز نے ہمیں بتایا کہ نوری جب ڈھائی سال کی ہوگی تو اس کی پہلے ایک آنکھ کی سرجری ہوگی اور کچھ وقت بعد اس کے دوسری آنکھ کی سرجری ہوگی۔ ساتھ ہی اس دوران ڈاکٹرز نے تین نئے آئی ڈراپس کا تجربہ کرنے کے لیے نوری کے آنکھوں میں ڈال دیے جس کے بعد اس کی بینائی واپس آگئی۔ اگرچہ نادیہ اس وقت لندن میں تھیں اور جب ان کے میاں نے انہیں ویڈیو کال کے ذریعے نوری کی بینائی واپس آنے کی اطلاع دی تو یہ سن کر بہت حیران ہوگئیں.

نادیہ جمیل کا کہنا تھا کہ اگرچہ ان کی کوئی سگی اولاد نہیں لیکن انھوں نے 6 بچوں کو گود لے رکھا ہے جس میں 5 بیٹے اور ایک بیٹی شامل ہے. ان کے تمام بچے اب بڑے ہوچکے ہیں.