والدہ مسیحی تھیں، انہوں نے شادی کے لیے اسلام قبول کیا۔۔ آمنہ الیاس کی والدہ پر کیا بڑی پریشانیاں گزریں؟ پہلی بار انکشاف کردیا

میری والدہ مسیحی تھیں جنہوں نے محبت اور شادی کے لیے اپنا مذہب تبدیل کر کے اسلام قبول کیا۔ یہ انکشاف پاکستانی شوبز کی معروف اداکارہ آمنہ الیاس نے کیا ہے۔

حال ہی میں اداکارہ آمنہ الیاس نے ایک پوڈ کاسٹ میں شرکت کی جہاں انہوں نے اپنی فیملی اور کیرئیر سے متعلق بات کی۔

پوڈ کاسٹ میں اداکارہ نے بتایا کہ ہم ٹوٹل چار بہنیں تھیں، جس میں سے سب سے بڑی بہن 20 سال کی عمر میں دل کا دورہ پڑنے سے انتقال کر گئی تھیں جب کہ ان کے والد کا اس وقت انتقال ہوگیا تھا جب وہ محض 4 برس کی تھیں۔

آمنہ نے بتایا کہ ان کے والد کا اصل تعلق پنجاب کےشہر ملتان سے تھا، وہ ہربل ادویات کا کاروبار کرتے تھے جب کہ ان کی والدہ نرس تھیں اور دونوں کی ملاقات سندھ کے دارالحکومت کراچی میں ہوئی اور دونوں نے ایک دوسرے سے شادی کرلی تھی۔

انہوں نے بتایا کہ ان کی والدہ مسیحی خاتون تھیں اور انہوں نے شادی کی خاطر اسلام قبول کیا لیکن شوہر کے انتقال کے بعد شوہر کے خاندان والوں نے ان کی والدہ سے تعلقات ختم کردیے تھے۔

ان کے مطابق ایک ایسی خاتون جو غیر مسلم تھیں اور اس کے تمام رشتے دار غیر مسلم تھے وہ اس خاتون سے مذہب چھوڑنے کی وجہ سے ناراض تھے جب کہ دوسری جانب جن کے لیے مسلمان بنیں ان کے انتقال کے بعد اس کے خاندان کے افراد انہیں قبول کرنے کو تیار نہیں تھے۔

آمنہ الیاس کے مطابق ان کی والدہ نے سخت مشکلات اور مصیبتیں دیکھیں، انہوں نے بطور نرس اپنا کیریئر جاری رکھا اور تمام بچوں کی پرورش کرنے سمیت انہیں اعلیٰ تعلیم دلوائی اور تمام مشکلات کا بہادری سے مقابلہ کیا۔