میرے دل کی دھڑکن اچانک تیز ہوجاتی ہے۔۔ اس تکلیف کی اہم وجہ! ڈاکٹر اس مرض سے بچنے کے کیا طریقے بتاتے ہیں؟

اکثر بڑی عمر کے افراد یا آج کل نوجوان بھی یہ شکایت کرتے نظر آتے ہیں کہ ان کے دل کی دھڑکن اچانک تیز ہوجاتی ہے جس کی وجہ وہ سمجھ نہیں پاتے اور دل کا مرض سمجھ کر گھبرا جاتے ہیں۔

ڈاکٹر محمد عاصف گل معدے کے امراض کے ماہر ڈاکٹر ہیں جن کا تعلق لاہور سے ہے۔ مرہم ٹی وی کے وی لاگ میں دل کی دھڑکن اچانک بڑھ جانے کے متعلق ڈاکٹر عاصف کا کہنا تھا کہ جب بھی دھڑکنوں کی رفتار غیر معمولی محسوس ہو تو فوراً دل کا مکمل چیک کروائیں لیکن اکثر ایسا ہوتا ہے کہ دھڑکن تیز ہونے کا سبب دل کا مرض نہیں بلکہ معدے میں بننے والی گیس ہوتی ہے۔ لیکن کیا آپ دل کی دھڑکن تیز ہونے کا علاج جانتے ہیں؟

ڈاکٹر صاحب نے بتایا کہ چونکہ معدہ اور دل جسم میں ایک دوسرے کے قریب ہوتے ہیں تو زیادہ گیس بننے کی وجہ سے پیٹ میں دباؤ ہوتا ہے اور palpitation شروع ہوجاتی ہے جسے لوگ دل کی دھڑکن کا تیز ہونا سمجھ لیتے ہیں۔

وجوہات

اس مرض کی وجوہات بیان کرتے ہوئے ڈاکٹر عاصف نے بتایا کہ دل کی دھڑکن تیز ہونے کا علاج بروقت کرنا ضروری ہے اور گرم غذا، مرغن یا مصالحے والی غذا کا استعمال، زیادہ کھانا کھانے یا کھانا کھا کر فوراً سوجانا یا پھر درد کم کرنے والی دواؤں کا استعمال کرنے سے معدے میں گیس بننے لگتی ہے۔

بچنے کے لئے کیا کریں؟

اگر گیس کی تکلیف ہوجائے یا پہلے سے ہی اس سے بچنا چاہتے ہیں تو اس بات کا خیال رکھیں کہ مرچ مصالحے والے کھانوں کے بجائے سادہ خوراک کا استعمال کریں، کیفین والے مشروب جن میں چائے، کافی اور کولڈ ڈرنک بھی شامل ہے، ان کا استعمال ترک کردیں، رات کو سونے سے 4 گھنٹے پہلے کھانا کھالیں اور اونچا تکیہ لگا کر سوجائیں۔