بارش کی بوند سے اگنے والی اس سبزی کو جنتی کیوں کہا جاتا ہے؟ جانیں اسکی حقیقت اور بے شمار فائدے

اللّٰہ تعالیٰ نے انسانوں کیلیئے بےشمار پھل، سبزیاں اور اناج پیدا کئے ہیں جو موسم کے حساب سے اگتے ہیں کچھ سردیوں میں تو کچھ گرمیوں میں، اور ان کے بے شمار فائدے اور استعمال بھی ہیں۔ ایسی ہی ایک سبزی جسے کھمبی کہتے ہیں۔

کھمبی کی تاریخ:

کھمبی (جسے مشروم بھی کہا جاتا ہے)، کی تاریخ اتنی پرانی ہے جتنا کہ انسان۔ کھمبیاں ہزاروں سالوں سے انسان کے کھانے اور مختلف ثقافتوں میں دواؤں کے مقاصد کے لیے استعمال ہوتی رہی ہیں۔ قدیم مصر میں، کھمبیوں کے بارے میں خیال کیا جاتا تھا کہ وہ جادوئی طاقتیں رکھتی ہیں کیونکہ یہ تاروں رات اگ جاتی تھیں، اسلیئے اسے صرف امیر اور طاقتور افراد کیلیئے مخصوص کیا جاتا تھا۔ قدیم یونانیوں کا خیال تھا کہ مشروم جنگجوؤں کو طاقت فراہم کر سکتے ہیں، جبکہ چینی 2000 سال سے زیادہ عرصے سے اپنے صحت کے فوائد کے لیے اسے استعمال کر رہے ہیں۔

کھمبی کیا ہے؟

یہ ایک پھپوند ہے جس کی جڑ تنا پتے اور پھول نظر نہیں آتے مگر پھل پھر بھی دیتا ہے۔ اس کا بیج بالکل باریک ہوتا ہے جو پک کر گر جاتا ہے یوں برسات کے موسم میں بارش کے بعد ساز گار موسم اور نمی میں پھوٹتا ہے۔

کھمبی کے فائدے:

کھمبی میں متعدد ممکنہ صحت کے فوائد موجود ہیں، جیسے کہ مدافعتی نظام کو بڑھانا، سوزش کو کم کرنا، اور کینسر سے لڑنے میں مدد کرنا۔ مشروم کی کچھ اقسام میں بیٹا گلوکین نامی مرکبات ہوتے ہیں، جو مدافعتی افعال کو بہتر بنانے اور انفیکشن کے خطرے کو کم کرنے کے لیے جانے جاتے ہیں۔ دیگر مشروم میں پولی سیکرائڈز نامی مرکبات ہوتے ہیں، جن میں سوزش کی خصوصیات ہوتی ہیں اور یہ ذیابیطس اور دل کی بیماری جیسی دائمی بیماریوں کے خطرے کو کم کرنے میں مدد کر سکتے ہیں۔ کھمبی میں پروٹین زیادہ مقدار میں پائی جاتی ہے، یہ فشار خون اور دل کے مریضوں کے لیے بھی فائدہ مند قرار دی گئی ہے۔

اس سبزی کو جنتی کیوں کہا جاتا ہے؟

اسے جنتی سبزی یا جنتی غذا اسلیئے کہا جاتا ہے کیونکہ، حدیث شریف میں اس کو من و سلویٰ میں شمار کیا گیا ہے اور اس کے پانی کو آنکھوں کی شفا یابی قرار دیا گیا ہے۔ کھمبی قدرت الٰہی کی عظیم نشانی ہے۔

پاکستان میں کھمبی کی اقسام اور کاشت:

پاکستان میں کھمبیوں کی تقریباً 56 اقسام ہیں ان میں 4 بلوچستان 3 سندھ 5 پنجاب اور 44 اقسام خیبرپختونخوا اور آزاد کشمیر میں پائی جاتی ہیں۔

دنیا کے بہت سارے ممالک میں اس کی کاشت کی جاتی ہے لیکن بدقسمتی سے ہمارے ملک میں غیر روایتی فصلوں اور دوسری غذائی اجناس پر توجہ نہیں دی جاتی، اس ضمن میں کھمبی کی کاشت فائدہ مند ہوسکتی ہے۔