بچے بیمار ہیں کوئی مدد کرنے والا نہیں۔۔ مرحوم گلوکار اسد عباس کے انتقال کے بعد گھر والے کس حال میں ہیں؟ بیوہ کی جذباتی ویڈیو

Late Singer Asad Abbas Widow Heart Wrenching Appeal

"اسد عباس کے انتقال کے بعد کسی نے ہمارا حال تک نہیں پوچھا، میرے بچے بیمار ہیں اور ہمارے پاس کوئی مددگار نہیں" یہ الفاظ ہیں مرحوم گلوکار اسد عباس کی اہلیہ آمنہ اسد کے، جو آنکھوں میں آنسو لیے ایک ویڈیو پیغام میں حکومت سے مدد کی اپیل کر رہی ہیں۔

آمنہ اسد نے پنجاب حکومت سے درخواست کی ہے کہ وہ ان کے بچوں کے علاج اور ان کی کفالت میں مدد کرے، کیونکہ وہ شدید مشکلات کا سامنا کر رہی ہیں۔ ان کا کہنا ہے کہ اسد عباس نے اپنی زندگی میں کئی بڑے اعزازات حاصل کیے، لیکن ان کے جانے کے بعد کسی نے پلٹ کر بھی نہیں دیکھا۔

واضح رہے کہ اسد عباس، جو اگست 2023 میں جگر کے عارضے کے باعث انتقال کر گئے تھے، پاکستان کے نامور گلوکاروں میں شمار کیے جاتے تھے۔ انہوں نے اپنے کیریئر میں "پاکستان سنگیت آئیکون" سمیت کئی اہم ایوارڈز اپنے نام کیے، اور لکس میوزک ایوارڈز جیسے معتبر اعزازات کا بھی حصہ بنے۔

تاہم، ان کے انتقال کے بعد ان کے اہل خانہ شدید مشکلات میں گھر چکے ہیں۔ ایک وقت تھا جب اسد عباس کی آواز ہر محفل کی جان ہوا کرتی تھی، مگر آج ان کے خاندان کو بنیادی ضروریات کے لیے بھی مدد درکار ہے۔

یہ لمحہ فکریہ ہے کہ پاکستان کے فنکار جو اپنی محنت سے ملک کا نام روشن کرتے ہیں، ان کے جانے کے بعد ان کے خاندانوں کو نظر انداز کر دیا جاتا ہے۔ کیا حکومت اور متعلقہ ادارے ان کی آواز سنیں گے؟ یا ایک اور فنکار کا خاندان بے بسی کی تصویر بنا رہے گا؟