کیری کے چھلکے بھی نہ پھینکیں۔۔ جانیں بے کار سمجھ کر پھینکے جانے والے ان چھلکوں کے زبردست فائدے اور استعمال

میٹھے رسیلے آم آنے میں تو ابھی کچھ وقت باقی ہے البتہ کھٹی اور ذائقے دار کیریاں بازار میں آچکی ہیں۔ خواتین کو خاص طور پر کیریاں بہت پسند ہوتی ہیں کیونکہ ان کی چٹنی اور اچار وغیرہ بنا کر آم کھانوں کو بھی مزیدار بنایا جاسکتا ہے۔ یہاں تک کہ اس کے چھلکے بھی بیکار نہیں ہیں۔آج ہم آپ کو کیریوں اور اس کے چھلکوں کے چند زبردست فائدے اور استعمال بتائیں گے جن سے آپ بھی مستفید ہوسکتے ہیں۔

کیری کی غذائی اہمیت

کیری یا کچا آم ایک غذائیت سے بھرپور پھل ہے جس میں کیلوریز کم اور وٹامنز اور منرلز زیادہ ہوتے ہیں۔ یہ وٹامن سی کا ایک بھرپور ذریعہ ہے۔ صرف ایک کپ کیریوں میں پوٹاشیم، میگنیشیم، کیلشیم، فائبر اور اینٹی آکسیڈنٹس کی اچھی خاصی مقدار ہوتی ہے۔

کیری کے چھلکے کے فائدے

کیری کے چھلکوں میں وٹامن سی، وٹامن اے، پوٹاشیم اور معدنیات پائے جاتے ہیں۔ کیری کے چھلکے بلڈ پریشر اور دل کو صحت مند رکھنے میں مدد کرتے ہیں، اس میں اینٹی آکسیڈینٹس بھی پائے جاتے ہیں جو جلد کو جھریوں سے نجات دیتے ہیں۔

کیری کے چھلکوں میں پایا جانے والا فائبر قبض ختم کرتا ہے۔ آنتوں کو صحت مند رکھتا ہے جس سے موٹاپا بھی کم ہوتا ہے۔ کیری کے اندر وٹامن سی قوت مدافعت کو مضبوط کرتا ہے۔ اس کے علاوہ وٹامن اے بینائی کو تیز کرتا ہے۔

کیری کے چھلکے کیسے استعمال کریں؟

سب سے پہلے کیریوں کو دھو کر چھلکے اتار کر الگ کرلیں۔ ان چھلکوں کو سکھا کر اچار، یا چٹنی بنا کر کھایا جاسکتا ہے۔ ابال کا ان کا قہوہ یا شربت بھی بنا کر ان کے فائدے اٹھائے جاسکتے ہیں۔ ان کو سالن میں ذائقہ بڑھانے کے لئے ڈالا جاسکتا ہے، سلاد یا گارنشنگ کے لئے استعمال کیے جاسکتے ہیں اس کے علاوہ اسموتھی بنا کر پیا جاسکتا ہے۔