بول نہیں سکتی تو کیا ہوا محنت تو کرسکتی ہوں۔۔ سننے اور بولنے سے معذور خاتون کیسے کام کررہی ہیں؟ ویڈیو نے لوگوں کو تعریف کرنے پر مجبور کردیا

"انسان اپنی کمی اور محرومی سے آگے بڑھ سکتے ہیں اپنے پیروں پر کھڑے ہوسکتے ہیں اور زندگی میں ضرور کچھ نہ کچھ کرسکتے ہیں۔"

یہ ماننا ہے کراچی کی رہائشی شبانہ ارشد کا جنھوں نے ثابت کردیا کہ معذوری مجبوری نہیں ہوتی، اگر کسی میں ہمت و لگن ہو تو وہ اپنے جذبے سے دنیا کو حیران کرسکتا ہے۔ شبانہ کی کام کرتے ہوئے ویڈیو نے سوشل میڈیا صارفین کو بھی داد دینے پر مجبور کردیا. آپ بھی دیکھیں

شبانہ جو قوت گویائی اور سماعت کی صلاحیت سے محروم ہیں لیکن وہ نہایت عمدہ طریقے سے اپنا آن لائن بزنس چلارہی ہیں۔ وہ گھر میں چیزیں بنا کر صارفین کو ڈلیور کرتی ہیں اور وہ تقریباً تمام طرح کے کھانے بنا سکتی ہیں۔ اتنا ہی نہیں بلکہ شبانہ کے شوہر بھی قوت گویائی اور سننے کی صلاحیت سے محروم ہیں لیکن اس جوڑے نے دنیا کے لیے مثال قائم کرتے ہوئے اپنی معذوری کو اپنی طاقت بنا لیا ہے۔

شبانہ اور ان کے میاں کے دو بچے ہیں اور یہ آن لائن بزنس کے ذریعے اپنے دونوں بچوں کی پرورش نہایت خوش اسلوبی سے کررہے ہیں۔ اللہ نے ان پر خاص کرم کیا ہے کہ اس جوڑے کے بچے مکمل طور پر صحت مند ہیں اور تعلیم حاصل کر رہے ہیں

شبانہ لوگوں سے اشاروں کے ذریعے بات کرتی ہیں اور آرڈر بھی بک کرتی ہیں وہ کام اس لیے کرنا چاہتی ہیں کہ وہ لوگوں کے لیے مثال بن سکیں اور اپنی کمی کو اپنی ہمت کے آڑے نہ آنے دیں۔

ہوم شیف کے طور پر اپنی پہچان بنانے والی شبانہ لوگوں کو کھانا ڈلیور کرنے کا کام گزشتہ دو سالوں سے کررہی ہیں۔ بولنے اور سننے کی صلاحیت سے محرومی کے باجود انھوں نے اپنے ہنر کو بہترین طریقے سے استعمال کرکے دنیا کے لیے مثال قائم کی ہے۔