ماڈلنگ کی تصویریں بھیجیں تا کہ رشتہ نہ بھیجے۔۔ جیا علی شادی کیوں نہیں کرنا چاہتی تھیں؟ پہلی بار کافی کچھ بتا دیا

Jiya Ali Opens Up About Marrying

"میں نے سوچا اگر عمران کو اپنی ماڈلنگ کی تصاویر بھیج دوں تو شاید وہ رشتہ لانے کا ارادہ بدل دے، کیونکہ مجھے لگتا تھا میری عمر میں شادی آسان نہیں اور میں بیرونِ ملک رہنے والے شخص سے رشتہ نہیں کرنا چاہتی تھی، لیکن وہ پھر بھی لاہور سے کراچی رشتہ لے کر آگئے۔"

ماضی کی مشہور اداکارہ جیا علی نے اپنی شادی سے متعلق یادیں تازہ کرتے ہوئے ایک دلچسپ قصہ سنایا۔ انہوں نے بتایا کہ ان کی اور عمران ادریس کی پہچان تقریباً چھ برس پرانی ہے۔ عمران، جو ہانگ کانگ میں کرکٹ کوچنگ کے ساتھ پاکستانی کمیونٹی کے لیے مختلف تقریبات بھی کرتے تھے، ان سے پہلی ملاقات ایک پروگرام کے حوالے سے ہوئی۔ اگرچہ وہ تقریب منعقد نہ ہوسکی، لیکن دونوں میں دوستانہ تعلقات قائم ہوگئے۔

اداکارہ کے مطابق عمران کا پہلا فیس بک میسج ان کے دل کو چھو گیا تھا کیونکہ اس میں وطن سے بے پناہ محبت جھلکتی تھی۔ اسی وجہ سے جیا علی نے اپنا ذاتی نمبر بھی دے دیا۔ اس کے بعد کئی برسوں تک دونوں میں معمولی رابطہ رہا، بس کبھی کبھار وہ ہانگ کانگ جانے کی خواہش کا ذکر کرتیں۔

سالوں بعد جب انہیں ایک برانڈ کے لیے سامان درکار ہوا تو وہ دوبارہ عمران سے رجوع کر بیٹھیں۔ اسی دوران عمران پر گھر والوں کی جانب سے شادی کے دباؤ میں اضافہ ہوا اور انہوں نے اچانک جیا علی کو شادی کی پیشکش کردی۔ اگلے ہی دن وہ لاہور سے کراچی جا پہنچے تاکہ رشتہ لے سکیں۔

جیا علی نے انکشاف کیا کہ انہوں نے عمران کو روکنے کے لیے اپنی ماڈلنگ کی پرانی تصویریں بھیجیں، لیکن ان کے عزم پر کوئی فرق نہ پڑا۔ ہنستے ہوئے انہوں نے کہا کہ رشتہ لانے سے پہلے عمران نے اچانک انہیں "بہن" کہنا بھی چھوڑ دیا تھا، جس سے صاف ظاہر تھا کہ کچھ بڑا ہونے والا ہے۔

جیا علی نے مزید کہا کہ وہ ہمیشہ ایک ایسے شریکِ حیات کی خواہش مند رہی تھیں جو محنتی ہو، سادہ پس منظر سے تعلق رکھتا ہو اور خوش قسمتی سے عمران میں وہ تمام خوبیاں موجود ہیں۔