بالوں کے ساتھ ساتھ جلد کو بھی چمکا دیں، سرسوں کے تیل کے کچھ ایسے فوائد جن کے بارے میں کم لوگ جانتے ہیں

سرسوں کے تیل کا استعمال ہمارے گھرانوں میں صدیوں سے رائج ہے۔ اکثر افراد اس کو گھر کی مرغی دال برابر سمجھتے ہوئے اس کے استعمال کو اولڈ فیشن سمجھتے ہیں اور یہی وجہ ہے کہ بالوں کو لمبا کرنے کے لیے مہنگے شیمپو اور کنڈيشنر تو خرید لیں گے۔ جلد کو چمکانے کے لیے مہنگے پارلر سے ٹریٹنمٹ تو کروا لیں گے مگر گھر پر موجود سرسوں کے تیل کا استعمال نہیں کریں گے-

سرسوں کے تیل کے بالوں کے لیے فوائد

وقت سے پہلے بالوں کی سفیدی

وقت سے قبل بالوں کی سفیدی کو روکنے کا دعویٰ تو بہت لوگ کرتے ہیں مگر اس کے لیے سرسوں کے تیل سے بہتر کچھ اور نہیں ہوتا ہے- سرسوں کے تیل میں وٹامن، معدنیات، فولاد کیلشیم اور فیٹی ایسڈ موجود ہوتے ہیں- اس کے علاوہ اس میں بیٹا کیروٹین بھی موجود ہوتا ہے جو کہ وٹامن اے میں تبدیل ہوجاتا ہے جس سے بالوں کو صحت ملتی ہے اور قبل از وقت سفیدی کا عمل رکتا ہے اس کے لیے ہفتے میں کم از کم دو بار باقاعدگی سے سرسوں کے تیل کی بالوں پر مالش کرنا مفید ہوتا ہے-

بالوں کو گرنے سے روکے

بالوں کا گرنا مرد ہو یا عورت سب ہی کو پریشان کر دیتا ہے جس کو روکنے کے لیے سرسوں کے تیل میں ہم وزن زيتون کا تیل اور ناریل کا تیل شامل کر دیں اور ہفتے میں ایک بار اس سے سر پر مساج کریں اور اس کے بعد تین سے چار گھنٹوں کے لیے اس کو بالوں پر لگا رہنے دیں اور اس کے بعد شیمپو کر لیں۔ کچھ ہی دنوں میں بالوں کا گرنا بند ہو جائے گا تاہم اگر بال نہیں بھی گر رہے تو اس کا استعمال بالوں کی صحت اور چمک دمک میں اضافہ کرتا ہے-

سرسوں کے تیل کے جلد کے لیے فوائد

سرسوں کے تیل کے صرف سر کے بالوں کے لیے ہی نہیں بلکہ جلد کے لیے بھی بہت سارے فوائد ہیں جو کچھ اس طرح سے ہیں-

دھوپ سے جلد کی رنگت کی خرابی کو دور کرنا

عام طور پر دھوپ میں باہر نکلنے سے جلد کی رنگت ماند پڑ جاتی ہے جس کو واپس نارمل حالت میں لانا آسان نہیں ہوتا ہے- اس کو دوبارہ نارمل حالت میں لانے کے لیے سرسوں کا تیل اور ناریل کا تیل ہم وزن لے کر اچھی طرح ملا لیں اور اس سے متاثرہ جلد پر نرم ہاتھوں سے 10 سے 12 منٹ تک مساج کریں اور اس کے بعد ویٹ ٹشو سے اس کو اچھی طرح سے صاف کر لیں- جلد کی رنگت قدرتی طور پر نہ صرف بحال ہو جائے گی بلکہ اس کی چمک دمک میں بھی اضافہ ہو جائے گا-چھائيوں کو دور کرنے کے

لیے

چھائيوں کو دور کرنے کے لیے ایک چمچ بیسن لے لیں اس میں چند قطرے شہد اور تھوڑی سی مقدار میں سرسوں کے تیل کو اس طرح ملا لیں کہ ایک پیسٹ بن جائے اس پیسٹ کو ہلکے ہاتھوں سے چہرے پر لگائيں اور اس کے بعد نیم گرم پانی سے اس کو دھو لیں یہ عمل ہر روز سونے سے قبل کریں- کچھ ہی دنوں میں چھائيوں کا رنگ ہلکا ہونے لگے گا اور وہ غائب ہو جائيں گی-

ہونٹوں کی خشکی دور کرنے کے لیے

عام طور پر سرد موسم میں ہونٹ خشک ہو کر پھٹنے لگتے ہیں اگر ہونٹوں کو نرم اور خوبصورت بنانا ہے تو اس کے لیے سرسوں کے تیل کے کچھ قطرے اپنی ناف میں لگائيں- روزانہ صبح یہ عمل کرنے سے ہونٹ نرم اور نازک ہو جائيں گے- سرسوں کے تیل کے یہ استعمال اگرچہ کم قیمت بھی ہیں اور ان کے فوائد بھی بہت زيادہ ہیں-