جسم پر اچانک نیل کیسے پڑ جاتے ہیں؟ بغیر کسی چوٹ کے جسم پر پڑنے والے نیل کم کرنے کے لئے ڈاکٹر نے کیا علاج بتایا؟

اکثر ہمیں پتا نہیں چلتا اور جسم پر نیل ابھرا نظر آتا ہے۔ ایسے میں کبھی کوئی پوچھ بیٹھے کہ یہ نیل کیسے پڑا تب جا کر ہمیں احساس ہوتا ہے کہ جسم پر کوئی نیل بھی ہے۔ آج ہم آپ کو بتائیں گے جسم پر اچانک نیل کیسے پڑ جاتے ہیں اور انھیں کس طرح دور کیا جاسکتا ہے۔

ڈاکٹر عاصم اللہ بخش جنرل کنسلٹنٹ فزیشن ہیں۔ مرہم ٹی وی کے وی لاگ میں انھوں نے بتایا کہ نیل کا جلدی ابھر آنا اکثر خاندانی وراثتی بیماریوں کی وجہ سے بھی ہوتا ہے اس کے علاوہ بچوں کے جسم پر آسانی سے یا بغیر چوٹ لگے نیل نہیں پڑتا اس کے علاوہ مردوں کے مقابلے میں خواتین کے جسم پر بھی نیل کے نشان جلدی ابھرتے ہیں۔

نیل پڑنے کی وجوہات بیان کرتے ہوئے ڈاکٹر اللہ بخش کا کہنا تھا کہ چوٹ لگنے کی وجہ سے تو نیل پڑتا ہی ہے لیکن اکثر وٹامن اے اور کے کی کمی، مختلف کینسر کی علامتوں کے طور پر، جگر کی بیماریوں اور درد کم کرنے کی یا دل کی بہت زیادہ دوائیں کھانے کی وجہ سے بھی پڑسکتے ہیں۔

علاج

نیل کو کم کرنے کے لئے برف کی ٹکور کی جاسکتی ہے اس کے علاوہ اگر کسی پرانی چوٹ کی وجہ سے نیل کا نشان ہے تو گرم ٹکور کریں اس کے علاوہ مرہم لگا کر اس جگہ کو باندھنے سے بھی نیل کا نشان کم ہونے لگتا ہے۔ وٹامن کی کمی کی وجہ سے نیل ہو تو وٹامن سی کی سپلیمینٹ لینے سے بھی نیل کا نشان جاتا رہتا ہے۔ البتہ اگر نیل کا نشان بڑھنا شروع ہوجائے تو یہ واضح الارم ہے کہ اب آپ کو فوری طور پر ڈاکٹر سے رجوع کرنا چاہیے۔