10 دن پہلے شادی ہوئی تھی اور۔۔ بھارتی جنگی جنوں میں شہید ہونے والا کشمیری نوجوان کون تھا؟

Jammu Kashmir Me Shaheed Honay Wala Nojawan Kon Tha

جموں و کشمیر کے ضلع باغ کے پُر امن گاؤں کوٹیٹری نجم خان میں جمعے کی صبح ایک اور دل دہلا دینے والی خبر نے ہر آنکھ اشکبار کر دی۔ بھارتی فوج کی بلااشتعال فائرنگ نے 22 سالہ اُسامہ عشرت کی نئی نویلی زندگی چھین لی۔ وہ اُسامہ، جو محض دس دن پہلے شادی کے بندھن میں بندھا تھا، آج تابوت میں لپٹا گھر واپس آیا۔

اسی قیامت خیز گولہ باری میں اُس کی دو بہنیں بھی شدید زخمی ہو گئیں، جنہیں اسپتال میں زندگی اور موت کی کشمکش میں چھوڑ آیا ہے۔

وزیر صحت آزاد کشمیر نثار انصر ابدالی کے مطابق، بھارت کی جارحیت کھوئی رٹہ اور باغ کے کئی دیہاتوں پر قہر بن کر ٹوٹی۔ نہتے شہریوں کے گھر خاکستر، خواب بکھر گئے۔ ایک ماں، اُس کی 40 دن کی ننھی بچی اور دو دیگر افراد سمیت چار شہری شہید ہوئے، جبکہ سات زخمی ہیں۔

یہ وہ لوگ تھے جو کسی جنگ کا حصہ نہیں، جن کے پاس نہ بندوق ہے نہ بارود—صرف جینے کی خواہش، بچوں کے مستقبل کی امید، اور آسمان سے برستی قیامت کے نیچے ایک محفوظ سانس کی دعا۔

جموں و کشمیر کے عوام کا مقدمہ نہ اقوام متحدہ میں سنا گیا، نہ بڑی طاقتوں کے اجلاسوں میں۔ ان کا جرم شاید یہ ہے کہ وہ سرحد پر رہتے ہیں، جہاں سیاست دانوں کے فیصلے نہیں، توپوں کے دہانے بولتے ہیں۔

ہر شہادت، ہر جنازہ، ہر زخمی چہرہ ایک چیخ ہے — ہمیں جنگ نہیں، امن چاہیے… ہمیں موت نہیں، زندگی چاہیے۔